АКШнын коргоо министри Пит Хегсет бейшемби күнү үч жума мурун башталган АКШ менен Израилдин Иранга каршы согушу качан аяктаары боюнча "так убакыт графиги" жок экенин билдирди.
Маалымат жыйынында сөз сүйлөгөн Хегсет: "Так убакыт алкагын белгилегибиз келбейт, план боюнча ийгиликтүү алга жылып жатабыз", — деди. Хегсет согуштун качан токтотуларына байланыштуу акыркы чечимди президент Дональд Трамптын чыгарарын белгиледи.
"Качан максатыбызга жеттик деп айтуубуз — бул президенттин тандоосуна жараша болот", — деп белгиледи министр.
Хегсет Пентагондун Конгресстен согушту каржылоо үчүн 200 миллиард доллардан ашык кошумча каражат сураганы тууралуу кабарларга да токтолду.
"200 миллиард доллар маселесине келсек, бул сан өзгөрүшү мүмкүн. Ачыгын айтканда, жаман адамдарды жок кылуу үчүн акча керек", — деди ал.
Министр буга чейинки аракеттерди жана алдыдагы пландарды каржылоо үчүн Конгресске кайрадан кайрыла тургандарын ырастады.
Хегсет менен бирге сүйлөгөн генерал Дэн Кейн Иранга жана анын союздаштарына каршы колдонулган курал-жарактар тууралуу маалымат берди.
Кейн абадан жакын колдоо көрсөтүү үчүн иштелип чыккан A-10 Warthog учактары согуш башталгандан бери Иран деңиз каттамдары үчүн жапкан стратегиялык Ормуз кысыгында "тез жүрүүчү чабуулчу кайыктарды" жок кылууда.
Өзгөчө AH-64 Apache тик учактары Ирактагы Иранды жактаган куралдуу топторду бутага алуу үчүн колдонулуп жатканын жана АКШнын айрым союздаштары бул тик учактарды Тегеран күчтөрү учурган бир тараптуу дрондорду нейтралдаштыруу үчүн колдоно баштаганын белгиледи.
Буга чейин администрациянын жогорку даражалуу кызматкери Пентагондун согуш үчүн кошумча 200 миллиард доллар каржылоону сурап жатканын билдирген.
Атын атагысы келбеген кызматкердин айтымында, Коргоо министрлиги бул өтүнүчтү Ак үйгө билдирди.
Бирок Трамптын салыктарды кыскартуу саясатынан жана өткөн жылдагы чоң аскердик чыгымдардан кийин Конгресс бул өтүнүчтү колдойбу же жокпу, азырынча белгисиз.
