Сириянын маалымат министри Хамза эл-Мустафа, YPG террордук уюму жетектеген SDF менен жетишилген ок атышууну токтотуу жана интеграция келишими дүйшөмбү күнү күчүнө кирерин жарыялады. Эл-Мустафа бул келишимди мамлекеттик бийликти бекемдөөгө жана өлкөнүн түндүк-чыгышындагы чыңалууну азайтууга багытталган кадам катары мүнөздөдү.
Жума күнү «Syria TV» менчик телеканалына маек берген эл-Мустафа Дамаск администрациясы бул макулдашуу менен «оң кадам» таштоону көздөп жатканын белгилеп, Дейр-эз-Зор жана Раккада кайрадан көзөмөлдү кайтарып алгандан кийин жер-жерлердеги кырдаалдын "мурдагыдай эмес" экенин кошумчалады.
Эл-Мустафанын айтымында, Хасеке жана Камышлы шаарлары менен аскердик күчтөрдүн интеграциясын камтыган акыркы келишим 18-январда жетишилген мурдагы макулдашууга негизделген. Ал жаңы келишимдин ишке ашыруунун практикалык механизмдерин тактаганын баса белгиледи.
18-январда өкмөт менен YPG террордук уюмунун жетекчилигиндеги SDF ортосунда Сириянын түндүк-чыгышында аскердик кагылышууну токтотуу жана Евфрат дарыясынын чыгышындагы негизги аймактарда мамлекеттик бийликти толук калыбына келтирүү максатында келишимге кол коюлган. Бул макулдашуу Дамасктын бийлиги астында дароо ок атышууну токтотууну, ошондой эле административдик, аскердик жана институционалдык интеграцияны караган алкакты белгилеген.
Жаңы келишимге ылайык, YPG террордук уюму жетектеген SDF мүчөлөрү Коргоо министрлигине караштуу аскердик бригадаларга жеке тартипте интеграцияланарын билдирген Эл-Мустафа, бул процесстин дүйшөмбү күнү башталарын айтты. Ошол эле күнү Хасекеге жаңы дайындалган коопсуздук башкармалыгынын башчысы да кызматына киришерин белгиледи.
Мустафа өкмөт 10 күндүн ичинде Рмейлан жана ал-Сувейде мунай кендерин, ошондой эле Камышлы аэропортун көзөмөлгө аларын кошумчалады.
YPG террордук уюму өзүн Сирия күрттөрүнүн жалгыз өкүлү катары көрсөтүүгө аракет кылып, маселени саясатташтырып жатканын айткан Эл-Мустафа, өкмөт күрт коомчулугуна тиешелүү маселелерди талкуулоо үчүн акыркы убакта «Күрт улуттук кеңеши» баш болгон ар кандай саясий багыттагы күрт делегациялары менен жолугушууларды өткөргөнүн белгиледи.
Өкмөт жума күнү жасаган буга чейинки билдирүүсүндө, YPG жетектеген SDF менен ички бөлүнүүнү токтотууну жана толук интеграцияга жол ачууну көздөгөн «ар тараптуу келишимге» кол коюлганын жарыялаган.
