Россия катуу кыш шарты уланып жаткан маалда АКШнын президенти Дональд Трамптын өтүнүчү менен 1-февралга чейин Киевге карата аба соккуларын токтотууну кабыл алды. Вашингтон согушту токтотуу үчүн дипломатиялык чечим издөөнү улантууда, Украина да буга жооп кайтарууга даяр экенин билдирди.
Бирок жекшемби күндөн тарта Украинанын борбор шаарын жаңы бир суук аба толкуну күтүүдө, президент Владимир Зеленский жума күнү жасаган билдирүүсүндө эки өлкөнүн арасында расмий ок атышпоонун жок экендигин айтты. Зеленский Россиянын кол салууларын Украинанын логистикалык инфраструктурасын бутага алганын да кошумчалады.
Россия акыркы күндөрү Украинанын кургактык жолдору менен темир жолдорун бомбалады.
Кремль билдиргендей, президент Владимир Путин тынчтык сүйлөшүүлөрү үчүн «ыңгайлуу шарттарды» түзүү максатында, Трамптын Киевди бомбалоону токтотуу боюнча талабын кабыл алды. Акыркы жумаларда Россиянын Киевдеги энергетикалык инфраструктурага жасаган чабуулдары, абанын температурасы кээде - 15 градустан төмөн түшкөн мезгилде жүз миңдеген адамдын күн бою үйлөрүндө жылуулуксуз калышына себеп болгон.
Кремлдин басма сөз катчысы Дмитрий Песков: «Президент Трамп сүйлөшүүлөр үчүн ыңгайлуу шарттарды түзүү максатында 1-февралга чейин, бир жума бою Киевге чабуул жасабоо өтүнүчү менен президент Путинге жеке өзү кайрылды. Президент Путин бул өтүнүчтү кабыл алды», — деди.
Зеленский Украина да жооп кайтарууга даяр экенин жана Россиянын мунай иштетүүчү инфраструктурасына жасаган чабуулдарын токтото аларын белгилеп, муну «келишим эмес, мүмкүнчүлүк» экенин айтты.
Telegram каналы аркылуу билдирүү жасаган Зеленский, түн ичинде Украинанын энергетикалык объектилерине чабуул болбогонун, Москва көңүлүн логистикалык инфраструктурага бурганын айтты.
Бул айда Киевдин көпчүлүк бөлүгүндө электр үзгүлтүгүнө жол ачкан орус аба кол салууларына токтолгон Зеленский Украина абадан коргонуусунун Киевдин европалык союздаштарынын АКШ менен жүргүзүлгөн PURL курал сатып алуу программасынын алкагында төлөмдөрдү кечиктиргендиктен алсыраганын айтты. Мунун натыйжасында АКШда жасалган Patriot абадан коргонуу ракеталары убагында келбегендигин белгиледи.
Өз ара соккулар
Украинанын аба күчтөрү Россиянын акыркы түнкү чабуулдарында баллистикалык ракета жана 111 дрон колдонгонун жарыялады. Зеленский ракета Украинанын түндүк-чыгышындагы Харьков аймагында АКШ компаниясына таандык кампаларга зыян келтиргенин билдирди, бирок компаниянын атын атаган жок.
Украина армиясы болсо өлкөнүн түштүк - чыгышындагы Запорожье аймагында айрым орус логистикалык объектилерге сокку урулганын билдирди.
Зеленский жума күнү өзүнүн кеңсеси тарабынан жарыяланган билдирүүсүндө: «Америкалыктар эки тарап тең алыскы аралыкка атуучу куралдарды колдонуудан алыс болуу боюнча белгилүү бир кадамдарды таштоо менен дипломатияга жол ачууну каалашарын жана ушул алкакта чыңалууну басаңдатуу маселесин күн тартибине киргизүүнү каалап жатышканын айтышты», — деди.
Энергетика секторунда ок атышууну токтотууга багытталган кадамдар, согуш келерки айда төртүнчү жылына кире турган маанилүү мезгилде ташталууда.
Ошол эле учурда Россиянын аскерлери Украинанын чыгышындагы Донецк облусунда жай, бирок туруктуу илгерилөөсүн улантууда. Москва фронт сызыгынан алыс жайгашкан өлкөнүн чыгышындагы жана түштүгүндөгү Украинанын шаар-кыштактарына дээрлик күн сайын жүздөгөн дрон менен чабуул жасоону улантууда.
