АКШнын мамлекеттик катчысы Марко Рубио Израилдин Катарга жасаган, ХАМАС мүчөлөрүн бутага алган чабуулу Тель-Авив менен Вашингтондун ортосундагы мамилелерге таасир этпейт деп билдирди.
«Албетте, биз бул окуяга кубанган жокпуз; президент да кубанган жок», – деп Рубио ишемби күнү Британия менен Израилге жөнөп кетер алдында журналисттерге айтты.
«Бул биздин Израил менен болгон мамилебиздин мүнөзүн өзгөртпөйт, бирок биз бул тууралуу сөз кылышыбыз керек — негизинен, бул Газа боюнча тынчтык келишимине жетүү боюнча дипломатиялык аракеттерге кандай таасир этет деген маселени талкуулайбыз»,-деди ал.
Израиль шейшемби күнү Дохадагы ХАМАС лидерлери жашаган турак жай комплексине чабуул жасаган.
Чабуулда ХАМАСтын беш мүчөсү жана АКШ сунуштаган жаңы келишимди талкуулап жаткан катарлык коопсуздук кызматкери каза тапты. Бул келишим Газадагы кырдаалды токтотууга багытталган болчу, анда 2023-жылдын октябрынан бери Израиль 64 миңден ашуун адамдын өмүрүн алган.
Катар, АКШ жана Египет менен бирге, бул кырдаалды токтотуу боюнча сүйлөшүүлөрдө ортомчу болуп келген.
Нетаньяху кол салууну жактады
Израилдин премьер-министри Биньямин Нетаньяху болсо, Катарда жашаган ХАМАС лидерлерин жок кылуу барымтадагыларды бошотуу жана Газадагы кырдаалды токтотуу үчүн негизги тоскоолду жоюу деп эсептээрин белгилеген.
«Катарда жашаган ХАМАСтын террордук лидерлери Газадагы элге кам көрбөйт. Алар согушту чексиз узартуу үчүн бардык тынчтык аракеттерин токтотуп жатышат», – деп Нетаньяху X социалдык тармагындагы билдирүүсүндө жазды.
ХАМАС болсо, Дохадагы чабуулду Израилдин тынчтык сүйлөшүүлөрүн бузуу аракети катары мүнөздөп, бул алардын Газадагы кырдаалды токтотуу боюнча шарттарын өзгөртпөй турганын билдирди.
Израилдин Дохага жасаган чабуулунан кийин Тель-Авив аймактагы алты өлкөгө, анын ичинде Палестина, Йемен, Сирия, Ливан, Иран жана Катарга чабуул жасады.
