Украина президенти Владимир Зеленский согушту токтотууга багытталган сүйлөшүүлөрдү күчөтүү жана туткундарды алмашууну кайра баштоо аракеттерин илгерилетүү максатында Түркияга келүүнү пландап жатканын билдирди.
Шейшемби күнү Telegram аркылуу бөлүшкөн билдирүүсүндө Зеленский шаршемби күнү "бир катар жолугушууларды" өткөрөрүн, бирок Түркиянын кайсы шаарында болорун же кайсы маектештер менен жолугаарын так айткан жок.
Украина лидери: "Эртең Түркияда жолугушуулар болот. Биз сүйлөшүүлөрдү күчөтүүгө даярданып жатабыз жана өнөктөштөрүбүзгө сунуштай турган чечимдерди иштеп чыктык. Согушту токтотуу - Украинанын эң башкы артыкчылыгы. Ошондой эле туткундарды алмашууну жана согуш туткундарын кайтарууну кайра баштоо үчүн иштеп жатабыз", - деди.
Зеленский эл аралык сапарынан кийин "Эл кызматчысы" партиясынын парламент мүчөлөрү менен жолугушуп, "мамлекетибизге керектүү бир нече зарыл болгон юридикалык демилгелерди көтөрүүнү жана тез чечимдерди кабыл алууну" сунуштай турганын айтты.
АКШнын маалымат каражаттары АКШнын атайын өкүлү Стивен Виткофф да шаршемби күнү Зеленский менен сүйлөшүүлөргө катышуу үчүн Түркияга келет деп күтүлүп жатканын билдиришти.
Кремль: Орусия бул аптадагы сүйлөшүүлөргө катышпайт
Ошол эле учурда Кремль шейшемби күнү жасаган билдирүүсүндө Орусия бул аптада Түркиядагы жолугушууларга катышпай турганын айтты. Кремлдин басма сөз катчысы Дмитрий Песков журналисттерге: "Жок, эртең Түркияда орус өкүлү болбойт. Азырынча бул сүйлөшүүлөр Орусиянын катышуусуз жүрүп жатат", - деди.
Песков Орусиянын президенти Владимир Путин сүйлөшүүлөрдүн жыйынтыктары тууралуу Түркия же АКШ аркылуу кабардар болууга даяр экенин кошумчалады.
Reuters ошондой эле Путиндин атайын өкүлү Кирилл Дмитриевге жакын булак 24-26-октябрда АКШда өткөн жолугушууда АКШнын өкүлү Виткофф менен "абдан жемиштүү талкууларды" өткөргөнүн билдиргенин айтты.
НАТОнун мүчөсү катары Түркия Киев жана Москва менен диалог жүргүзүп, 2022-жылдан бери ортомчулук ролду ойноп келет. Түркия Орусия тарабынан бөгөттөлгөн Украинанын үч портунан дан экспортун калыбына келтирүүгө багытталган тарыхый Кара деңиз дан демилгеси да арасында болгон көптөгөн сүйлөшүүлөрдү өткөрдү.
Бул акыркы дипломатиялык аракеттер Түркия согушуп жаткан тараптардын ортосунда ортомчу катары маанилүү ролду ойноону улантып жаткан учурда болуп жатат. Бирок кеңири сүйлөшүү процесси алсыз бойдон калууда.
