Орусиянын президенти Владимир Путин Палестинанын Газа аймагынан орус жаранынын бошотулушунан кийин Хамаска ыраазычылык билдирди.
Жакында эле бошотулган орус жараны Александр Труфанов жана анын үй-бүлөсү менен Кремлде жолуккан Путин шаршемби күнкү билдирүүсүндө, Труфановдун бошотулушун Орусиянын Палестина эли менен эзелтен бери келе жаткан мамилесине байланыштырды.
"Албетте биз ушундай ийгиликтерди тез-тез кайталоо жана ушундай кыйынчылыктарды башынан өткөргөндөрдүн эркиндигин камсыз кылуу үчүн колубуздан келгендин баарын жасайбыз", - деди Путин.
Труфановду бошоткондугу үчүн палестиналык ХАМАС тобуна ыраазычылык билдирген Путин аймактагы жалпы кырдаал боюнча саясий баа берген жок.
"Менин оюмча, Хамастын саясий жетекчилигине биздин чакырыгыбызга кулак салып, бул кадамды ишке ашырганы үчүн ыраазычылык билдиришибиз керек — сиз бошотулдуңуз. Ошол үчүн сизди куттуктагым келет", - деди.
Орус маалымат агенттиктери Путиндин ошондой эле Труфановдун апасы Елена менен анын сүйлөшкөн кызы Сапир Коэнге гүл тапшырганын жазышты. Бул адамдар да 250гө жакын туткундун арасында эле.
АКШ менен Израилдин эки жүздүүлүгү
Путиндин бул кадамы АКШ менен Израилдин ХАМАС барымтадагыларды бошотууга каршы чыгып жатат деген дооматтарына карама-каршы келет. Бул дооматтарды барымтадагылардын өздөрү да четке каккан.
Шаршемби күнү палестиналык Ислам Жихады тобу израилдик-немис жараны Ром Браславскинин видеосун жарыялады. Видеодо Браславски премьер-министр Биньямин Нетаньяхуну курчоого алынган Газаны тынымсыз бомбалоосу үчүн сындаган.
“Кайдасың?” – деп сураган Браславски, Нетаньяхуну барымтадагыларды бошотуу убадасын аткарбаганы үчүн күнөөлөгөн.
Ал ошондой эле Улуттук коопсуздук министри Итамар Бен-Гвирди да ок атышууну токтотуу жана барымтадагыларды бошотуу келишимине каршы чыкканы үчүн айыптады.
Аптанын башында израилдик-америкалык туткун Эдан Александр президент Дональд Трампты Нетаньяхунун калптарына ишенгени үчүн сынга алган.
Александр Хамастын бир нече апта мурун барымтадагыларды бошотууга даяр экенин, бирок Нетаньяху андан баш тартып ок атышпоону токтотконун жана согушун кайра баштоону чечкенин эске салды.
