Кыргызстан Бириккен Улуттар Уюмунун Коопсуздук Кеңешинин туруктуу эмес мүчөсү болуп шайланды. 3-июнда Башкы ассамблеядагы добуш берүүдө Кыргызстан Азия-Тынч океан аймагына бөлүнгөн орун үчүн атаандаш болгон Филиппин мамлекетин артта калтырды. Эки мамлекет добуш берүүнүн үч айлампасында жетиштүү добуш ала алган жок. Төртүнчү айлампада гана Кыргызстан 142 добуш менен алдыга озду.

Өлкө Коопсуздук кеңешиндеги эки жылдык мөөнөтүн 2027-жылдын 1-январынан тартып баштайт.

Кыргызстан Коопсуздук кеңешине тарыхта биринчи жолу шайланып жатат. Борбор Азия мамлекеттеринен Казакстан гана 2017-2018-жылдары бул милдетти аркалаган.

Кыргыз Республикасынын президенти Садыр Жапаров добуш берүүнүн жыйынтыгы белгилүү болору менен фасебук баркчасынан «Биз БУУнун жаңы тарыхын жазууга катышабыз. Мекендештерим, куттуктайм!», - деп жазды.

Өлкө өнөктүгү учурунда чакан мамлекеттердин, тоолуу аймактардын жана деңизге чыга албаган өлкөлөрдүн үнүн күчөтүүнү убада кылган.

Коопсуздук кеңеши эл аралык тынчтык жана коопсуздук маселелерин караган БУУнун негизги органы болуп эсептелет. Анын курамына беш туруктуу жана ар бир эки жылда алмашып турчу он мамлекет кирет.

Учурда Кыргызстанды дүйнөнүн ар тарабындагы өлкөлөр, уюмдар жана жеке жактар куттуктап жатышат.

 Түркия Республикасынын Адилеттик жана өнүгүү партиясынын басма сөз кеңсесинин куттуктоосу:

“Биз боордош Кыргыз Республикасын 2027-2028-жылдарга БУУнун Коопсуздук Кеңешинин туруктуу эмес мүчөсү болуп шайланышы менен чын жүрөктөн куттуктайбыз.

Бул жетишкендик жана өкүлчүлүк түрк дүйнөсүнүн глобалдык системадагы ролунун жогорулашынын жаңы көрсөткүчү болуп саналат.

Биз Кыргызстандын конструктивдүү мамилеси жана жоопкерчиликтүү дипломатиясы БУУнун Коопсуздук Кеңешиндеги тынчтыкка жана кызматташтыкка баалуу салым кошот деп ишенебиз.

Биз бир туугандарыбызга толук колдоо көрсөтүп, аларга мындан ары да ийгиликтерди каалайбыз! 👏”