Полиция Манчестердин түндүгүндөгү синагога алдында унаа жана бычак менен жасалган кол салууда эки киши каза болуп, төрт киши жаракат алганын, кол салуучунун болсо атып өлтүрүлгөнүн кабарлады.

Манчестер полициясы, шаардын түндүк-батышында жайгашкан Крампсал районундагы Хитон Парк Хебрей Конгрегациясынын синагогасына чакыруу түшкөндөн кийин "каргашалуу окуя" болгонун кабарлады.

Билдирүүдө «Окуя болгон жерге тез жардам кызматкерлери барып, жарандарга жардам көрсөтүп жатышат», – деп айтылды. Ошондой эле «Учурда төрт жаран унаанын сүзүп кетишинен жана бычактан жаракат алган абалда» деген сөздөр камтылды.

Полиция таңкы саат 9:38де ок атылганын жана атып өлтүрүлгөн кишинин кол салуучу болушу мүмкүн экенин айтты.

Премьер-министр Кир Стармер бул окуяны «коркунучтуу кол салуу» деп атап, Даниядагы ЕБ менен сүйлөшүүлөрүнөн эрте кайтып келерин ырастады.

«Бул окуя еврей календарынын эң ыйык күнү – Йом Кипурда болгондугу аны ого бетер коркунучтуу кылат», – деди. “Биздин жүрөгүбүз жабыркагандардын үй-бүлөлөрү менен бирге жана тез жардам кызматтарына, биринчи жардам көрсөткөндөргө ыраазычылык билдирем” деп кошумчалады.

“Олуттуу окуя”

Манчестердин мэри Энди Бёрнхэм BBCге берген маегинде шаар «олуттуу окуя» менен күрөшүп жатканын айтты.

«Ошол эле учурда мен муну да айта алам, азыркы учурда коопсуздук коркунучу жоктой көрүнөт. Полиция коомчулуктун жана коопсуздук кызматкерлеринин чоң колдоосу менен бул маселени тез арада чечти», – деди.

Полиция окуя болгон жерге эртең мененки саат 9:34тө куралдуу күчтөр жөнөтүлгөнүн, ошол учурда бир күзөтчүгө бычак менен кол салуу болгондугу тууралуу маалымат түшкөнүн кабарлады.

Бёрнхэм адамдарды «социалдык медиада божомолдорду жайылтпоого» чакырып, еврей коомчулугу «бул кабарга өтө тынчсызданарын» айтты.

Түндүк-Батыш тез жардам кызматы болсо "окуя болгон жерге бригадалар жөнөтүлгөнүн" маалымдады. Билдирүүдө: «Учурда кырдаалга баа берип, берки өзгөчө кырдаалдар кызматтары менен биргеликте иш алып баруудабыз», - деп айтылды.