Гренландиянын премьер-министри Йенс-Фредерик Нильсен АКШнын президенти Дональд Трамптын Арктикадагы бул автономдуу аймакты басып алуу боюнча коркутууларынан кийин алар АКШнын курамына киргенден көрө, Даниянын башкаруусунда калууну артык көрөрүн билдирди.
Шейшемби күнү Копенгагендеги басма сөз жыйынында Гренландиянын премьер-министри: "Учурда геосаясий кризиске туш болуп жатабыз жана эгерде АКШ менен Даниянын ортосунда тандоо жасашыбыз керек болсо, биз Данияны тандайбыз", - деди.
Арктикадагы бул аймакты көп жылдар бою сатып алуу же аннексиялоо идеясын жактап келген Трамп жекшемби күнү АКШнын аймакты "кандайдыр бир жол менен" тартып аларын айтып, чыңалууну ого бетер күчөттү.
Нильсен: "Баарына түшүнүктүү болушу керек: Гренландия АКШнын менчиги болгусу келбейт. Гренландия АКШ тарабынан башкарылгысы келбейт. Гренландия АКШнын бир бөлүгү болгусу келбейт", - деди.
Йенс-Фредерик Нильсенди басма сөз жыйынында коштогон Даниянын премьер-министри Метте Фредериксен "эң жакын өнөктөшүнөн келген жана таптакыр кабыл алынгыс бул кысымга" туруштук берүү оңой эмес экенин айтты.
"Бирок эң оор бөлүгү али алдыда экенин көрсөткөн көптөгөн белгилер бар", - деди Фредериксен.
Трамп АКШнын "улуттук коопсуздук" үчүн Гренландияга муктаж экенин бир нече жолу баса белгилеген.
Фредериксен "Албетте биз Арктика аймагынын коопсуздугу боюнча НАТОнун мүчөлөрү болгон АКШ, НАТО, Европа жана Арктика кеңешинин мамлекеттери менен кызматташууну күчтөндүргүбүз келет", - деп кошумчалады.
Даниянын тышкы иштер министри Ларс Лёкке Расмуссен жана гренландиялык кесиптеши Вивиан Моцфельдт шаршемби күнү Ак үйдө АКШнын вице-президенти Ж.Д. Вэнс жана мамлекеттик катчы Марко Рубио менен жолугушат деп күтүлүүдө.
