Сауд Арабиянын Тышкы иштер министрлигинин биргелешкен билдирүүсүндө Сауд Арабия, Түркия, Египет, Иордания, Индонезия, Пакистан, Катар жана Бириккен Араб Эмирликтери АКШнын президенти Дональд Трамптын "Тынчтык делегациясына" кошулуу чакырыгын кабыл алганы айтылды.
Шаршемби күнү жарыяланган билдирүүдө, ар бир өлкө өзүнүн укуктук жол-жоболоруна ылайык катышуу документтерине кол коёру маалымдалды. Трамп дүйнөлүк чыр-чатактарды чечүүнү көздөгөн бул демилгеге катышууга ондогон дүйнөлүк лидерлерди чакырган.
Бул делегациянын түзүлүүсү, 2023-жылдын октябрынан бери 71 000ден ашык адамдын өлүмүнө жана 171 000ден ашык адамдын жаракат алышына алып келген Израилдин Газадагы согушун токтотууга багытталган ок атышпоо келишиминин экинчи этабынын башталышы менен дал келет.
"Тынчтык делегациясы"
Жума күнү кечинде Ак үй Тынчтык делегациясынын түзүлгөнүн; Газадагы өткөөл процессти башкаруу үчүн дайындалган төрт түзүмдүн бири болгон Газа администрациясынын Улуттук комитетинин бекитилгенин жарыялаган.
Трамп жетектей турган жана 15ке жакын дүйнө лидерлеринен куралган делегация Палестинанын технократиялык өкмөтүн көзөмөлдөйт жана Газадагы кайра куруу процессине байкоо салат.
Делегацияга кошулушу күтүлүп жаткан өлкөлөрдүн арасында Улуу Британия, Германия, Франция жана Италия да бар. БУУнун Жакынкы Чыгыш боюнча мурдагы атайын өкүлү Николай Младенов Тынчтык делегациясынын өкүлү болуп кызмат кылышы мүмкүн экени айтылууда.
Бул демилге Трамп сунуштаган жана 2025-жылдын ноябрында БУУ Коопсуздук Кеңеши тарабынан 2803-резолюция менен кабыл алынган 20 пункттук пландын бир бөлүгү болуп саналат.
