Польшанын премьер-министри Дональд Туск шейшемби күнү, өлкөнүн ар кайсы аймактарында диверсия уюштурган деген шек менен сегиз киши коопсуздук күчтөрү тарабынан кармалганын билдирди.

Жетекчилердин айтымында, Польша көптөн бери Орусиянын “гибриддик согуш” тактикасынын алкагында өрт коюу жана киберчабуул сыяктуу кол салуулар менен бутага алынган өлкөлөрдүн катарына кирет. Орусия болсо бул айыптоолорду четке кагууда.

Туск X платформасындагы билдирүүсүндө: "ABW (ички коопсуздук агенттиги) башка мекемелер менен биргеликте өлкөнүн ар кайсы аймактарында диверсия уюштурууга шектелген сегиз кишини кармады" деп билдирди. Ал "Оперативдүү иштер жүрүп жатат" деп кошумчалады, бирок кенен маалымат берген жок.

Атайын кызматтарга жооптуу министр Томаш Семоняк болсо X платформасында мындай деп жазды: "Бул иштер аскердик объектилерди жана маанилүү инфраструктура элементтерин чалгындоо, диверсиялык аракеттерге унааларды даярдоо жана кол салууларды түздөн-түз аткаруу ыктымалдуулугун иликтөөнү камтыйт".