Дүйнө жүзү боюнча 400дөн ашуун ырчылар жана өнөрпоздор Израилдин санариптик платформаларынан өз музыкасын алып салууга багытталган маданий бойкотко катышарын жарыялашты. Бул кадам Газа тилкесиндеги палестиналыктарга каршы уланып жаткан геноцидге каршы нааразылык билдирүү максатын көздөйт.
Израилдин чабуулдары астында ачкачылыктан жапа чеккен адамдардын, өзгөчө балдардын көрүнүштөрү глобалдык нааразылыкты жаратып, чара көрүү чакырыктарын күчөттү.
Haaretz басылмасынын маалыматына ылайык, “Геноцид үчүн музыка жок” деген ураан менен башталган бул демилге ырчылардын өз чыгармаларын Израилдин платформаларынан алып салууга чакырат.
Бойкотко кол койгондордун арасында британиялык Massive Attack тобу, шотландиялык Primal Scream тобу, америкалык Japanese Breakfast тобу, америкалык ырчы-композитор Carole King, жапон поп-жылдызы Рина Саваяма жана даниялык өнөрпоз MØ сыяктуу белгилүү инсандар бар.
Өнөр менен акталууга уруксат жок
Акция уюштуруучуларынын билдирүүсүндө, бойкоттун максаты Sony, Universal жана Warner сыяктуу ири музыкалык компаниялардын да Орусиянын Украинага чабуулунан кийин жасалган кадамдарды ишке ашырып Израилге да ушундай эле санкцияларды киргизүүгө мажбурлоо экенин баса белгилешти.
“Маданият өз алдынча бомбаларды токтото албайт,” - деп айтылган билдирүүдө “Бирок маданият саясий кысымга каршы чыгып, коомдук пикирди адилеттүүлүккө бурууга, адамзатка каршы кылмыш жасаган компания же мамлекеттин өнөр аркылуу акталышына жана нормалдашуусуна жол бербөөгө салым кошо алат” деген сөздөр камтылды.
Бул бойкот Израилдин Газадагы чабуулдарына каршы дүйнө жүзү боюнча маданий, спорттук жана көркөм нааразылыктардын кеңири толкунунун бир бөлүгү болуп саналат.
