Польшанын мурдагы президенти Лех Валенса шаршемби күнү Польша менен АКШ лидерлеринин ортосундагы талаш-тартыш боюнча өз оюн билдирип, миллиардер Илон Маскты «маанисиз адам» деп атады.

Нобель тынчтык сыйлыгынын лауреаты Валенса Польшадагы Super Express гезитине берген маегинде «Келгиле, өзүбүздүн ишибизге көңүл буралы, Европада өз коопсуздугубузду жана күчтүү альянстарды түзөлү, Маск менен алектенбей аны ойлобой эле коелу. Ал мени кызыктырбайт... Андан алыс болуш керек... Ал маанисиз адам», – деп айтты.

Дем алыш күндөрү Польшанын тышкы иштер министри Радослав Сикорски АКШнын президенти Дональд Трампка жакындыгы менен белгилүү болгон Илон Маск жана АКШнын мамлекеттик катчысы Марко Рубио менен кайым айтышты.

Сикорски менен Маск Украинанын коммуникация инфраструктурасында маанилүү ролду ойногон Starlink системасы боюнча бетме-бет келди. Маск эгер Украинаны Starlinkтен ажыратууну кааласа өлкөнүн «бүт фронттук линиясы» кыйрамак деди.

Буга жооп катары Сикорски Украина үчүн Starlink кызматынын Польша тарабынан эки тараптуу соода келишиминин алкагында каржыланганын жана бул кызматты жабуу коркутуусунун альтернативдик тармакты издөөгө түрткү берерин айтты.

Андан кийин АКШнын мамлекеттик катчысы Рубио Сикорскини жалган маалыматтарды таратууда деп айыптады.

Рубио «Эч ким Украинаны Starlinkтен ажыратуу боюнча коркуткан жок. Жана Кудайга шүгүр, Starlinkсиз Украина эбак согушта жеңилмек, орустар да азыр Польша чек арасында болмок», – деди.

Бул сөздөрдөн көп өтпөй Маск Сикорскинин билдирүүсүнө түз жооп берди.

«Тынч бол, кичинекей адам. Сен чыгымдардын аз гана бөлүгүн төлөп жатасың. Жана Starlinkке альтернатива жок», – деп жазды ал.

Маск андан соң Сикорскини америкалык венгер инвестор Жорж Соростун «куурчагы» деп атады.