Жергиликтүү маалымат каражаттарынын кабарына караганда, Кытайдын президенти "бир тараптуу жана зомбулукту камтыган аракеттерди" сындап, "ири өлкөлөрдү" эл аралык укукту сактоого чакырды.
Дүйшөмбү күнкү билдирүүсүндө Си Цзиньпин: "Бардык өлкөлөр башка мамлекеттердин элдери тандаган өнүгүү жолдорун сыйлашы керек, эл аралык укукту жана Бириккен Улуттар Уюмунун Уставынын максаттары менен принциптерин сакташы керек; ири өлкөлөр буга жол көрсөтүшү керек", - деди.
Xinhua News кабарлагандай, ал бул сөздөрдү борбор шаар Пекинде Ирландиянын премьер-министри Майкл Мартин менен өткөргөн жолугушууда айтты.
Кытай лидеринин сөздөрү ишемби күнү АКШнын Венесуэлага жүргүзгөн рейди учурунда өлкөнүн президенти жана жубайы кармалып Нью-Йоркко алынып кеткеден кийин айтылды.
Си Цзиньпин: "Өзгөрүүлөр жана башаламандык менен курчалган дүйнөдө бир тараптуу жана мажбурлоочу аракеттер эл аралык тартипти олуттуу түрдө алсыратат",- деп билдирди.
Каракас жубайлардын бошотулушун талап кылууда
АКШ ишемби күнү Каракаска каршы "кеңири масштабдуу" операция баштап, президент Николас Мадуро менен жубайы Силия Флорести кармап кеткен.
The New York Times гезити Венесуэланын расмий өкүлдөрүнө шилтеме жасап, АКШнын рейдинде болжол менен 80 адам каза болгонун билдирди.
Мадуро менен Флорес Бруклиндеги Метрополитен сурак борборунда кармалууда. Жубайларга АКШнын федералдык соту тарабынан баңгизат аткезчилиги жана террористтик уюмдар деп эсептелген топтор менен кызматташкан деген айыптар коюлууда.
Мадуро бул айыптоолорду четке какты, ал эми Венесуэланын борбору Каракасындагы жетекчилер жубайлардын бошотулушун талап кылышты.
