Эл аралык миграция уюму (ЭМУ) коопсуздуктун начарлашынан жана аскерлештирилген Ыкчам колдоо күчтөрүнүн (RSF) кол салууларынын көбөйүшүнөн улам бир күндө 1600дөн ашык жаран Түштүк Кордофандагы Кертала шаарынан качып кеткенин билдирди.
Жекшемби күнү агенттиктин маалыматы боюнча, талаа топтору RSF зомбулуктарына байланыштуу коопсуздук шарттарынын начарлашынан улам 28-ноябрда Керталадан 1625 адам чыгып кеткен.
Агенттик жер которгондор Далами аймагына чачырап кеткенин жана аймактагы шарттар белгисиз жана чыңалган бойдон калганын билдирди.
Жекшемби күнү эртең менен күбөлөр Anadolu агенттигине Судан армиясы RSF менен союздаш болгон SPLM-Түндүк фракциясы менен кагылышуудан кийин Түштүк Кордофандагы Аббасия Тагали шаарынын батышындагы бир нече райондорду басып алганын айтышты.
Жума жана ишемби күндөрү армия ошол эле провинциядагы Керталага RSFтин чабуулунун мизин майтаргандыгы кабарланды.
Жер которгондордун акыркы толкуну SPLM-Түндүк фракциясы колдогон Түштүк Кордофандагы бир нече айылдарга RSFтин кол салууларынан жана жаштарды мажбурлап жалдоо үчүн уурдоодон кийин болду.
Туруксуз аймак
Кордофандын үч штаты — Түндүк, Батыш жана Түштүк — армия менен RSFтин ортосундагы бир нече жума бою катуу салгылашуулардын чордону болуп келген, бул адам укуктары уюмдарынын маалыматы боюнча, он миңдеген адамдардын жер которушуна алып келген.
RSF Судандын Батыш Дарфур аймагындагы 18 провинциясынын беш провинциясынын баарын көзөмөлдөйт, ал эми армия Түндүк Дарфурдун айрым түндүк бөлүктөрүн көзөмөлдөп турат.
Армия түштүктө, түндүктө, чыгышта жана борбордук Судандагы калган 13 провинциянын көпчүлүгүн, анын ичинде борбор шаар Хартумду кармап турат.
Дүйнөлүк саламаттыкты сактоо уюмунун (ДССУ) маалыматы боюнча, Судан армиясы менен RSF деп аталган Ыкчам колдоо күчтөрүнүн ортосундагы 2023-жылдын апрель айында башталган кагылышуулар кеминде 40 000 адамдын өлүмүнө жана 12 миллион адамдын жер которушуна алып келген.
