АКШда жайгашкан X социалдык медиа компаниясы аркылуу жарыяланган билдирүүдө Сириянын уюм коркунуч туудурган бардык аймактарда ДЕАШка каршы аскердик операцияларды күчөтүүнү улантары билдирилди.
Билдирүүдө АКШ жана АКШ жетектеген эл аралык коалициянын башка мүчөлөрүн Сириянын терроризмге каршы аракеттерин колдоого чакырып, мындай кызматташтык жарандарды коргоого, өлкөдө жана жалпы аймакта коопсуздукту жана туруктуулукту калыбына келтирүүгө жардам берери айтылды.
Американын кол салуусунун так кайда жасалганы, каза болгондордун саны же башка операциялык маалыматтар тууралуу билдирүү берилген жок.
Министрликтин билдирүүсү АКШ 13-декабрда Сириянын борбордук бөлүгүндөгү Пальмира шаарынын жанында америкалык аскерлерге жасалган өлүмгө алып келген кол салууга жооп иретинде Сирияда аскердик операция баштагандан бир нече саат өткөндөн кийин жарыяланды.
АКШ соккуларын күчөттү
Сириядагы кырдаалды көзөмөлдөгөн уюм ишемби күнү АКШнын түнкү соккуларында кеминде беш ДЕАШ террористтинин өлтүрүлгөнүн билдирди.
Вашингтон ЮНЕСКОнун тизмесине кирген байыркы Пальмира шаарындагы 13-декабрдагы кол салууну уюмдун бир гана куралчан адамы ишке ашырганын, кол салууда эки америкалык аскер жана бир америкалык жаран каза болгонун билдирди.
Америка Кошмо Штаттарынын кол салууга жооп катары "согуштук учактар, чабуул коюучу тик учактар жана артиллериялык аткылоо менен Сириянын борборундагы 70тен ашык бутага сокку урганын" билдирди.
