Орусиянын аба соккулары Украинанын чыгышындагы айрым аймактарда электр энергиясын үзгүлтүккө учуратып, миңдеген адамдар электр жарыгы жана жылытуусуз калды. Украина бийлиги температура нөлдөн төмөн түшкөндүктөн мындай кыймыл элдин жашоосуна кыйынчылык туудуруп жатканын айтты.

Украинанын мамлекеттик энергетикалык оператору «Укрэнерго» бир нече аймактардагы энергетикалык инфраструктурага ири масштабдуу дрондук чабуул жасалганын жарыялады.

Компания түн ортосунан бир аз мурун жарыялаган билдирүүсүндө, «Душман бир нече аймактардагы энергетикалык инфраструктурага ири масштабдуу дрондук чабуул жасады», деп билдирди.

«Натыйжада, Днепропетровск жана Запорожье аймактарында көпчүлүк керектөөчүлөр, анын ичинде аймактык борборлор электр жарыгысыз калышты».

Региондун аскердик администрациясынын башчысы Владислав Гайваненконун айтымында, чабуулдар Днепропетровск аймагындагы маанилүү инфраструктураны талкалаган.

Гайваненко Telegram баракчасындагы билдирүүсүндө: «Абал оор. Бирок, энергетика кызматкерлери коопсуздук мүмкүнчүлүк бергенден кийин калыбына келтирүү иштерин башташат», - деди. 

Запорожье облусунун губернатору Иван Федоров: «Негизги объектилерде электр энергиясы калыбына келтирилди, бирок көпчүлүк үй чарбалары электр жарыгысыз калууда», - деп кошумчалады.

«Биз бардык керектөөчүлөргө электр энергиясын мүмкүн болушунча тезирээк калыбына келтирүү үчүн күнү-түнү иштеп жатабыз; суу менен камсыздоо негизинен калыбына келтирилди»,-деди ал.

Киев жана анын өнөктөштөрү жарандык инфраструктураны бутага алуу суук айларда калкты алсыратууга багытталганын айтышууда.