АКШнын президенти Дональд Трамп Гондурастын шайлоо кызматкерлерин сынга алып, эгер алар 30-ноябрдагы президенттик шайлоонун жыйынтыктарын "өзгөртүүгө" аракет кылышса, өлкө оор кесепеттерге туш болорун эскертти.

Трамп дүйшөмбү күнү Truth Social платформасында "Көрүнүп тургандай Гондурас президенттик шайлоонун жыйынтыктарын өзгөртүүгө аракет кылып жатат. Эгер алар муну жасашса, кесепети оор болот!" - деп жазды.

Трамптын комментарийлери Улуттук шайлоо кеңешинин (CNE) башчысы Ана Паола Холл шайлоонун алдын ала жыйынтыктарын жарыялагандан кийин айтылды. Холл эки алдыңкы талапкер - оңчул талапкер Насри Асфура жана мурдагы теле алып баруучу Сальвадор Насралла - "техникалык жактан" тең экенин билдирген.

Холлдун айтымында, ошол учурда Асфура Насралладан 515 добушка алдыда турган.

Трамп: "Добуштардын 47 пайызы гана саналганда добуштарды саноо токтотулду. Комиссиянын добуштарды санап бүтүшү өтө маанилүү. Жүз миңдеген гондурастыктар өз добуштарын саноону талап кылып жатышат. Демократия жеңиши керек!" - деп билдирди.

Өткөн аптада Трамп консервативдик Улуттук партиянын талапкери Асфураны колдоп, мурдагы президент Хуан Орландо Эрнандести кечирүүгө убада берген.