Германиянын тышкы иштер министри Йоханн Вадефул шейшемби күнү анын өлкөсү Украинада туруктуу тынчтык орнотуу боюнча Орусия менен сүйлөшүүлөргө жалпысынан ачык экенин, бирок "жеңилдик берүүдө" баш тартканын билдирди.

Берлиндеги Конрад Аденауэр фонду уюштурган "Cafe Kyiv" Украина форумунда сөз сүйлөгөн Вадефул: "Албетте, биринчиден Украина сүйлөшө турган тарап болушу керек. Биз да сүйлөшүүгө даярбыз. Бирок Москвага барып, көбүрөөк жеңилдиктерди бербейбиз. Биз муну кылбайбыз. Эгерде ок атышууну токтотууга жетишилсе, сүйлөшүүгө олуттуу эрк болсо, албетте биз ал жерде болобуз. Бирок чынын айтсам, биз андан (Орусиянын президенти Владимир Путинден) жалынып жаткан жокпуз. Тескерисинче акылга сыярлык сунуштардан биринин акыры кабыл алынышын күтүп жатабыз", - деди.

Вадефул мисал катары бийликтеги Социал-демократиялык партиянын (SPD) ичинен келген, Путинге ок атышууну токтотуу боюнча сүйлөшүүлөрдү сунуштоо чакырыктарын четке кагып, "Диалог каналдары жетиштүү. Бирок Путин сүйлөшкүсү келбесе, бир дагы канал иштебейт" деп билдирди.

Кошумча санкциялар

Тышкы иштер министри Москвага ок атышууну токтотуу боюнча сүйлөшүүлөрдү кабыл алуу үчүн кысымды күчөтүүнү бир нече жолу талап кылды.

Дүйшөмбү күнү Брюсселде өткөн Евробиримдиктин тышкы иштер министрлеринин жыйынынын алдында немис министри: "Германиянын позициясы абдан ачык: биз эми чечкиндүүлүктү көрсөтүп, Украинаны туруктуу түрдө колдошубуз керек жана өткөн жылдагыдай эле Орусияга кысымды күчөтүүнү улантышыбыз керек. Ошондуктан биз 20-санкциялар пакетин даярдап жатабыз жана акырында биз ийгиликке жетебиз деп ишенем", - деди.