Украиналык расмий өкүл Украинанын чыгышындагы Богодухов шаарына орусиялыктардын чабуулунан төрт адам, анын ичинде үч кичинекей бала каза болгонун билдирди.
Аймактык аскер кызматкери Олег Синегубовдун айтымында, орусиялыктардын чабуулунан бир жаштагы эки бала жана эки жаштагы кыз каза тапты.
Синегубов Telegram баракчасында, балдар менен бир үйдө жашаган 34 жаштагы эркек киши жаракаттарынан улам каза болгонун; 74 жаштагы аял да жаракат алып, медициналык жардам көрсөтүлгөнүн жазды.
Мурдагы билдирүүсүндө Синегубов кол салуудан 35 жаштагы кош бойлуу аял да жаракат алганын айткан.
Богодухов Харьков облусунда жайгашкан, ал жерде орусиялык күчтөр транспорт жана энергетикалык инфраструктурага чабуулдарын күчөтүшкөн.
Ошол эле учурда шаршемби күнү облустун губернатору Андрей Бочаров Орусиянын түштүгүндөгү Волгоград облусунда түнкүсүн дрон соккусу өнөр жай объектисинин аймагында өрткө алып келгенин айтып: "Орусиянын Коргоо министрлигинин абадан коргонуу бөлүктөрү Волгоград облусундагы энергетикалык жана жарандык инфраструктуралык объектилерди бутага алган дрон чабуулунун мизин кайтарууда", - деди.
Бочаров чабуул турак жай имаратындагы батирге зыян келтиргенин жана дрондун сыныктары бала бакчанын аймагына да түшкөнүн, бирок азырынча курмандыктар тууралуу маалымат жок экенин билдирди.
