Европалык лидерлер менен Украинанын президенти Владимир Зеленский шейшемби күнү биргелешкен билдирүү жасап, АКШнын президенти Дональд Трамптын Украинадагы согуштук аракеттерди дароо токтотуу чакырыгын колдой турганын, бирок Киевдин бардык тынчтык сүйлөшүүлөрүн мүмкүн болушунча күчтүү позициядан баштоосу керектигин баса белгилешти.

Германия, Франция, Италия, Польша, Британия, Финляндия, Дания, Норвегия жана Европа Биридигинин жогорку даражалуу өкүлдөрү кол койгон билдирүү Трамптын үч жылдык согушту токтотуу үчүн тынчтык келишимине жетишүү боюнча жаңы аракетине Европанын макулдашылган жообун билдирет.

“Биз баарыбыз Украинанын эли татыктуу жана туруктуу тынчтыкка жетүүсүн каалайбыз,” – деп айтылат билдирүүдө.

“Биз президент Трамптын согушту дароо токтотуу жана сүйлөшүүлөрдүн башталышы үчүн учурдагы байланыш сызыгын негиз катары алуу позициясын толук колдойбуз.”

Бирок лидерлер маанилүү бир шартты да баса белгилешти: "Биз эл аралык чек араларды күч колдонуу аркылуу өзгөртүүгө болбойт деген принципте бекем турабыз."

Украинанын президенти Зеленский, Британиянын премьер-министри Кирр Стармер, Германиянын канцлери Фридрих Мерц, Франциянын президенти Эммануэль Макрон, Италиянын премьер-министри Джорджия Мелони жана башка лидерлер кол койгон билдирүүдө Россиянын атайылап жасалган тоскоолдук тактикасы сынга алынды.

Билдирүүдө: «Россиянын создуктуруу тактикасы Украинанын тынчтыкка олуттуу караган жалгыз тарап экенин кайра-кайра көрсөттү. Баарыбыз Путин зомбулукту жана кыйроону артык көрүүнү улантып жатканын көрүп жатабыз,- деп айтылды.

Лидерлер эки багыттуу стратегияны жарыялашты: Россияга карата экономикалык басымды күчөтүү, ошол эле учурда Украинанын өзүн коргоо жана натыйжалуу сүйлөшүүлөрдү жүргүзүү үчүн аскердик ресурстарга ээ болушун камсыздоо.

"Ошондуктан, биз Украинанын ок атышууну токтотууга чейин, учурунда жана андан кийин эң күчтүү позицияда болушу керектигине макулбуз. Путин тынчтыкка даяр болгонго чейин, Россиянын экономикасына жана коргонуу өнөр жайына болгон кысымды күчөтүшүбүз керек", - деп айтылат билдирүүдө.

Лидерлер Украинаны колдоо үчүн Россиянын тоңдурулган активдерин толук пайдалануу боюнча чараларды иштеп жатышканын билдирип, олуттуу дипломатиялык кадамга баруу ниетин жарыялашты.

Батыш өлкөлөрү согуш башталгандан бери Россиянын Борбордук банкындагы жүздөгөн миллиард доллар резервдерин тоңдурду.

Европалык лидерлер Украинага колдоо көрсөтүү үчүн саясий, экономикалык жана аскердик жардамды координациялоо маселесин ушул аптадагы эки негизги жыйында: Европа Биримдигинин Брюсселдеги жыйынында жана жума күнү Лондондо боло турган «Ыктыярдуулар коалициясынын» жыйынында белгилешет.