Түркия Республикасынын Коммуникация башкармалыгынын жазуу жүзүндөгү билдирүүсүндө, НАТОнун мамлекет жана өкмөт башчыларынын саммити 7-8-июлда Анкарада Түркиянын жетекчилигинде өтөөрү эске салынды.
Коммуникация башкармалыгы саммитке чейин Европадагы ар кандай союздаш борборлордо иш-чараларды уюштургандыгы баса белгиленген билдирүүдө төмөнкү маалыматтар камтылды:
"Бул иш-чаралардын алкагында Германияда жайгашкан Конрад-Аденауэр-Стифтунг менен биргеликте "2026-жылдагы Анкара саммитине карай жол: Евроатлантикалык коопсуздуктун келечегин калыптандыруу" деген аталыштагы тегерек стол уюштурулду. Түркия Республикасынын Берлиндеги элчиси Гөкхан Туран, Президенттин тышкы саясат жана коопсуздук боюнча башкы кеңешчиси элчи Акиф Чагатай Кылыч, НАТОнун Парламенттик Ассамблеясынын мүчөсү жана АК партиясынын Стамбулдагы парламент мүчөсү Огуз Үчүнжү, KAS башкы катчысы доктор Марк Спейчтин ачылыш сөздөрү менен коштолгон жыйында Түркиянын НАТОго болгон мамилеси жана акыркы эл аралык маселелер талкууланды. Жыйынды Конрад-Аденауэр-Стифтунгдун Жакынкы Чыгыш боюнча директору Томас Волк алып барды.
Конрад-Аденауэр-Стифтунгдун имаратында өткөн жыйынга ар кандай мекемелерден саясатчылар, чиновниктер жана адистер катышып, НАТОнун келечеги жана Түркия-НАТО мамилелерине карата өз көз караштары менен бөлүшүштү.
Жыйында глобалдык чыр-чатактарды жана туруксуздукту эске алуу менен, Анкарадагы НАТО саммити мүчөлөрдүн ортосундагы биримдикти жана тилектештикти чыңдоо үчүн маанилүү бурулуш учур болгону баса белгиленди. Билдирүүдө мындай деп айтылды:
“Түркия-Германия кызматташтыгын ар кандай тармактарда, айрыкча коргоо өнөр жайында өнүктүрүүнүн маанисине басым жасалды. Орусия-Украина согушунан жана Жакынкы Чыгыштагы күчөп бараткан кризистерден улам пайда болгон белгисиздикке көңүл бурулуп, НАТОнун мүчө мамлекеттер үчүн коопсуздук калканы мурдагыдан да маанилүү ролду ойной тургандыгы айтылды.
Андан тышкары, Түркиянын НАТОго болгон көз карашы да талкууланып, өлкөнүн Альянска кошулгандан бери аскердик жана саясий салымдары менен стратегиялык миссиялары бааланды”.
