Кремлдин билдирүүсүндө, Орусия Жакынкы Чыгышта уланып жаткан чыңалуунун шартында Иранга ар кандай жолдор менен жардам берүүгө даяр экени, бирок бул Тегерандын муктаждыктарына байланыштуу экени айтылды.
“Биз ортомчулук аракеттерибизди сунуштадык. Бул конкреттүү кадам. Өз позициябызды билдирдик, бул да Иран тарапка колдоо көрсөтүүнүн маанилүү көрсөткүчү,” - деди Кремлдин басма сөз катчысы Дмитрий Песков дүйшөмбү күнү журналисттерге.
Израиль менен Иран 13-июндан бери абадан согушуп жатат, Тель-Авив Ирандагы ар түрдүү буталарга, анын ичинде аскерий жана өзөктүк объектилерге күтүүсүз чабуул жасагандан кийин Тегеран жооп кайтаруу соккуларын баштаган.
Ошол эле учурда, АКШ жекшемби күнү эртең менен Ирандын үч негизги ядролук объектилерине сокку урду. АКШнын президенти Дональд Трамп бул объектилерге олуттуу зыян келтирилгенин жана “талкаланганын” билдирди.
Орусиянын президенти Владимир Путин менен Ирандын тышкы иштер министри Аббас Аракчинин Москвадагы жолугушуусу тууралуу Песков бул сүйлөшүүлөр пикир алмашууга, Тегерандын учурдагы кырдаал боюнча сунуштарын жана көз карашын Москвага билдирүүгө мүмкүнчүлүк берерин айтты.
‘Көз карандысыз процесстер’
Песков учурдагы чыңалууда катышуучулардын саны көбөйгөнүн белгилеп: “Албетте биз муну айыптайбыз жана бул жагдайга терең өкүнүчүбүздү билдиребиз,” - деди.
Песков Путин менен Трамптын акыркы сүйлөшүүлөрүндө Ирандын бир нече жолу күн тартибинде болгонун, бирок орус лидерине жекшемби күнкү кол салуулар тууралуу маалымат берилбегенин айтты.
Трамптын Ирандагы бийликти алмаштыруу тууралуу билдирүүсү жөнүндөгү суроого Песков: “Бир өлкөнүн жетекчилигинин тагдырын үчүнчү өлкөлөр же үчүнчү өлкөлөрдүн жетекчилиги эмес, анын эли чечиши керек” деп жооп берди.
АКШнын Иранга соккулары Москва менен Вашингтондун ортосундагы диалогго таасир этпей турганын, анткени булар “көз карандысыз процесстер” экенин кошумчалады.
“Бул ядролук объектилерде эмне болгонун, радиациялык коркунуч барбы же жокпу көрүш керек. Атомдук энергия боюнча эл аралык агенттиктин (МАГАТЭ) билдирүүсүнө ылайык, учурда радиациялык булгануунун белгилери жок деп айтылды. Бирок албетте булардын баары мыйзамдуу тынчсызданууну жараткан суроолор,” - деди Песков.
