Франциянын президенти Эммануэль Макрон Ирактын Эрбил аймагындагы кол салуудан сержант Арно Фриондун каза болгонун ырастады.

Макрон француз күчтөрүнө жасалган чабуулду "кабыл алынгыс" деп сыпаттап, Фриондун кылган кызматтарыына ыраазычылык билдирип, Франция өз кызматкерлерин коргоо үчүн тийиштүү түрдө жооп кайтараарын убада кылды.

Расмий булак терроризмге каршы машыгуу учурунда болгон дрон чабуулунан жети француз аскери жаракат алганын билдирди.

Ирактын Күрт аймактык өкмөтүнүн (КРӨ) командири Ширван Барзанинин айтымында, чабуул Махмур аймагындагы пешмерге-француз биргелешкен базасын бутага алды.

Дрондун кайсы тараптан келгендиги тууралуу азырынча маалымат жок.

Барзани жергиликтүү маалымат каражаттарына берген билдирүүсүндө, дрон чабуулу Пешмерге согушкерлерине кеңешчилик кылган француз күчтөрү колдонгон аскердик машыгуу аянтын бутага алганын айтып, "Ал жердеги француз жоокерлеринин согушка же кагылышка эч кандай тиешеси жок. Алар жөн гана Иракта мыйзамдуу түрдө жүргөн аскердик кеңешчилер", - деп кошумчалады.

Барзани окуяны "адилетсиз террордук акт" деп мүнөздөп, Ирак өкмөтүн ушул сыяктуу чабуулдардын алдын алууга чакырды.

Мурда Эрбилдин губернатору Омед Хошнав чабуулда алты француз жоокеринин жаракат алганын, алардын төртөө ооруканага жаткырылганын билдирген.