Украинанын президенти Владимир Зеленский, Украинанын миналарды колдонууга жана сактоого тыюу салган эл аралык келишимден чыгуусун көздөгөн жарлыкка кол койгонун билдирди.

Украинанын Жогорку Радасынын Улуттук коопсуздук, коргонуу жана чалгындоо комитетинин башчысы Роман Костенко жекшемби күнү Facebook баракчасында бул чечим тууралуу билдирүү жасады.

Костенко: “Украинанын президенти, Улуттук коопсуздук жана коргонуу кеңешинин Оттава конвенциясынан чыгуу чечимин ишке ашыруусу боюнча жарлыкка кол койгонун мага жаңы эле кабарлашты”, – деди.

Бул чечимдин себеби катары Орусиянын аталган келишимге катышпаганын жана Москванын Украинага каршы миналарды “кеңири” колдонуп жатканын айтты.

“Душман эч кандай чектөөлөргө дуушар болбогон кырдаалга байланып кала албайбыз”, – деген Костенко, бул маселе эми Жогорку Радада караларын кошумчалады.

Зеленский азырынча Костенконун билдирүүсүн расмий түрдө тастыктай элек.

1997-жылы кабыл алынган Оттава конвенциясы миналарды сатып алууга, өндүрүүгө, сактоого, өткөрүүгө жана колдонууга тыюу салат. Украина бул келишимге 1999-жылы кол коюп, 2005-жылы ратификациялаган.