Тайвань Кытайды жасалма интеллект колдонуп Тайванга каршы жалган маалымат таратууда деп айыптады. Улуттук коопсуздук бюросунун парламентке берген отчетуна караганда, Кытай ушундай жол менен Тайвань элин бөлүп-жаруу максатын көздөйт.
Пекиндин акыркы жылдарда Тайванга каршы аскердик машыгууларды, соода санкцияларын жана таасирдүү операцияларды күчөткөнүнө көңүл бурган Тайвань, Кытайдын эгемендик талаптарын кескин түрдө четке кагууда.
Ушул айдын башында Кытай Тайвандын жээгинде эки күндүк согуштук машыгууларды жана чыныгы октор менен машыгууларды өткөрдү. Бул кадамдар көптөгөн өлкөлөрдө, өзгөчө АКШда тынчсызданууну жаратты.
Отчетко ылайык, ушул жылдын башынан бери социалдык медиа платформаларында, өзгөчө Facebook жана TikTok тармактарында 500 миңден ашык “талаштуу билдирүүлөр” аныкталган. Бул билдирүүлөр Кытайдын Тайвандагы коомдук пикирге таасир этүү үчүн "когнитивдик согуш" жүргүзүп жатканынын белгиси.
Отчетто Кытайдын бул билдирүүлөрү өзгөчө Тайвандын президенти Лай Чинг-тенин өткөн айда Кытайга карата сүйлөгөн сөзү же Тайвандын чип гиганты TSMCдин АКШга инвестиция жарыялоосу сыяктуу сезимтал учурларда күчөгөнү кабарланды. Бул аракеттердин коомдо поляризацияны түзүүгө багытталганы баса белгиленди.
"Жасалма интеллект технологияларын колдонуу кеңейген сайын Кытайдын Коммунисттик партиясы бул технологияларды талаштуу билдирүүлөрдү өндүрүүдө жана жайылтууда колдонуп жатканы аныкталды" деп айтылат.
Кытайдын Тайвань иштери боюнча кеңсеси бул боюнча комментарий берүүдөн баш тартты.
"Боз аймак" тактикасы күчөп баратат
Отчетто ошондой эле Кытайдын Тайванга каршы "боз зона" тактикасын да күчөткөнү, быйыл Кытайдын жээк коопсуздук кызматынын Тайвандын сууларына жана аба мейкиндигине кирип баруусу кескин көбөйгөнү билдирилди.
“Тайвань бул мыйзам бузууларга жооп берүүгө аргасыз болду жана бул да өлкөнүн ресурстарын бир кыйла азайытты” деп айтылды.
Президент Лай март айында Кытайды "чет элдик душман держава" катары мүнөздөп, "Тайвандын келечегин Тайвань эли гана аныктай алат" деген.
Кытай Тайванды өзүнүн аймагы деп эсептеп, зарыл болсо күч колдонуу менен өз көзөмөлүнө алууну көздөйт.
