БУУнун Адам укуктары боюнча Жогорку комиссары Волкер Түрк октябрь айынын аягында Ыкчам колдоо күчтөрүнүн көзөмөлүнө өткөн Фаширдеги мыкаачылыктар Судандын Кордофан аймагында кайталанышы мүмкүн экенине "өтө тынчсызданып жатканын" билдирди.
Шаршемби күнү Женевада журналисттерге маалымат берген Волкер Түрк: "Дарфур жана Кордофандан Хартум жана Омдурманга чейин Судандын жарандары бул мыкаачылык жана маанисиз зомбулуктан жабыркады", - деди.
"Фаширдеги мыкаачылыктар Кордофанда кайталанышы мүмкүн экенине тынчсызданып жатам", - деген Волкер Түрк: "Абдан оор мыкаачылык кылмыштары, албетте согуш кылмыштары, адамзатка каршы кылмыштар жөнүндө да сөз кылып жатабыз", - деп кошумчалады.
БУУнун Адам укуктары боюнча комиссары этникалык негиздеги зомбулук да болуп жатканын баса белгиледи.
Кыргындар
Судан армиясы менен RSFтин ортосунда үч Кордофан штатында – Түндүк, Батыш жана Түштүктө – бир нече жума бою катуу салгылашуулар болуп, он миңдеген адамдар аймактан качып кетишти.
RSF батыш Дарфурдагы 18 штаттын бешөөсүн тең көзөмөлдөйт, бирок Түндүк Дарфурдун түндүк бөлүктөрү армиянын көзөмөлүндө.
Армия болсо түштүктө, түндүктө, чыгышта жана борбордо калган 13 штаттын көпчүлүк бөлүгүн, анын ичинде борбор шаар Хартумду көзөмөлдөйт.
Судан армиясы менен RSFтин ортосунда 2023-жылдын апрель айында башталган чыр-чатак миңдеген адамдардын өлүмүнө жана миллиондогон адамдардын жеринен ажырашына алып келди.
RSF Фаширде кыргындарды, кыйноолорду жана сотсуз өлтүрүүлөрдү кылганы менен айыпталууда.
