“Израилдин Коопсуздук кабинети, басып алынган Батыш Шериадагы 13 отурукташуу пунктун демаркациялоо жана мыйзамдаштыруу планын бекитти”, деп билдирди ашынган оңчул каржы министри Безалел Смотрих.
“Биз калктуу конуштарда нормалдаштыруу жана жөнгө салуу революциясын улантып жатабыз. Жашынып, кечирим суроонун ордуна – желек көтөрүп, куруудабыз жана отурукташып жатабыз. Бул аракет, Яхудия жана Самарияда (Батыш Жээк) чыныгы эгемендүүлүккө жетүү жолундагы дагы бир маанилүү кадам,” – деп билдирди Смотрих жекшемби күнү.
Отурукташуу пунктарын бөлүү чечими, ишемби күнү кечинде өткөрүлгөн Кабинет жыйынында кабыл алынган.
Палестинанын каршылык көрсөтүү тобу ХАМАС Израилдин бул кадамын “болуп жаткан абалды күч менен таңуулоо аракети” деп айыптады.
“Смотрихтин билдирүүсү, конуштардын бардык түрлөрү биздин элди жеринен жана ыйык жайларынан сүрүп чыгарууга, алардын жерлерин тартып алууга жана жек көрүндү апартеид режимин таңуулоого багытталган расисттик колонизация долбоору экенин тастыктайт. Бул эл аралык жана гуманитардык мыйзамдарга, конвенцияларга ачык каршы келет,” – деп айтылат ХАМАСтын билдирүүсүндө.
ХАМАС эл аралык коомчулукту Израилдин мыйзамсыз конуштарын кеңейтүүнү токтотууга чара көрүүгө чакырды.
770,000 мыйзамсыз израилдик конушчулар
Палестина булактары, 2024-жылдын акырына карата оккупацияланган аймактардагы 180 конуш жана 256 отурукташуу пунктунда болжол менен 770 миң мыйзамсыз израилдиктин жашаганын болжолдоодо.
Бириккен Улуттар Уюму басып алынган палестиналык аймактардагы бардык израилдик конуштарды эл аралык мыйзамдарга ылайык мыйзамсыз деп эсептейт жана алардын кеңейиши эки мамлекеттүү чечимге болгон аракеттерге коркунуч туудурарын эскертет.
Батыш Шериада чыңалуу күчөгөн бойдон калууда. Палестинанын Саламаттыкты сактоо министрлигинин маалыматына караганда, 2023-жылдын 7-октябрында Газага чабуул башталгандан бери Израиль армиясы жана мыйзамсыз отурукташуучулардын кол салууларынан кеминде 937 палестиналык набыт болуп, 7 миңден ашууну жараат алды.
Июль айында Эл аралык Адилет Соту, Израилдин палестиналык аймактарды узак убакыттан бери басып алуусун мыйзамсыз деп жарыялап, Батыш Жээк жана Чыгыш Кудстагы бардык конуштардан чыгып кетүүгө чакырган.
