АНКАРА (AA) - Жапониянын Кумамото префектурасында кечээ болгон 7,1 баллдык жер титирөөнүн кесепетинен каза тапкандардын саны 13кө жетти.
Каза болгондордун бирөөсү бир кабаты кулап түшкөн соода борборунда катталгандыгы, урандылардын астында дагы бир нече адам болушу мүмкүн экени айтылууда.
Мамлекеттик телеканал NHKнын маалыматына караганда, Жапониянын премьер-министри Такайичи Санаэ кечеги жер титирөө тууралуу басма сөз жыйынын өткөрдү.
Такайичи Кумамото префектурасынын түштүгүндөгү жер титирөөдөн каза тапкандардын саны 13кө жеткенин билдирди.
Кумамото префектурасынын администрациясы дагы жер титирөөнүн натыйжасында 31 адам жарадар болгонун маалымдады.
7,1 баллдык жер титирөө префектура боюнча өрттөргө, жолдор менен көпүрөлөрдүн кулашына чейин алып келип, кеңири масштабдуу зыянга себеп болду.
Жапониянын метеорология агенттиги (JMA) маалыматына караганда, Уки жана Хикава райондорунда жергиликтүү убакыт менен кечээ саат 16:27де жер титирөө болгон. 7,1 баллдык титирөө 10 километр тереңдикте катталган.
Кумамото префектурасында 2016-жылдын апрелинде болгон 7 баллдык жер титирөөдөн 277 адам каза болгон.
Жер титирөө коркунучу эң жогору болгон өлкөлөрдүн бири болгон Жапония жанар тоолордон жана океан чуңкурларынан турган "Тынч океан от шакекчесинде" жайгашкан.
