Улуу Британиянын Хитроу аэропорту электр подстанциясында өрт чыгып, электр энергиясы өчүрүлгөндөн кийин жума күнү жабылды. Кырдаал Европанын эң ири туристтик борборлорунун биринде жүз миңдеген жүргүнчүлөр үчүн каттамдарды үзгүлтүккө учуратты.

Каттамдар Гатвик аэропортуна, Париждеги Шарль де Голль аэропортуна жана Ирландиянын Шеннон аэропортуна бурулду. Бул маалыматты учактарды көзөмөлдөө кызматы тастыктады.

Хитроуга келген жана кеткен кеминде 1,350 каттам зыян тартты, анын ичинде АКШнын шаарларынан айрым каттамдар токтотулду. Бул маалымат менен учууга көз салуу кызматы FlightRadar 24 бөлүштү.

«Жүргүнчүлөрүбүздүн жана кызматкерлерибиздин коопсуздугун камсыз кылуу үчүн Хитроуну жума күнү толук бир күнгө жабуудан башка аргабыз жок», - деп айтылат аэропорттун билдирүүсүндө. «Биз жакынкы күндөрү олуттуу үзгүлтүккө учурашын күтөбүз жана жүргүнчүлөр аэропорт кайра ачылганга чейин саякатка чыкпашы керек».

Хитроу эл аралык саякат боюнча дүйнөдөгү эң көп каттаган аэропорттордун бири катары белгилүү. Ушул жылдын башында ал январь айында 6,3 миллиондон ашык жүргүнчү менен рекорддорду жаңырткан. Бул өткөн жылдын ушул мезгилине салыштырганда 5 пайыздан ашык өскөндүгүн билдирет. Январь айы менен катар бул аэропорт 11 ай катары менен күнүнө орточо 200 000ден ашуун жүргүнчүнү кабыл алган мезгил болчу. Бул өсүшкө трансатлантикалык саякаттын чоң салым кошкону айтылды.

Бардык каттамдар токтотулган Хитроу анын иштери тууралуу көбүрөөк маалымат болгондо жаңыртуу берерин айтты. Улуттук темир жол аэропортуна баруучу жана кайра келген бардык поезддерди токтотту.

Лондондун өрт өчүрүү кызматы бейшемби күнү кечинде Лондондун батышындагы электр подстанциясында трансформатор күйүп кеткенден кийин чыккан өрткө 10 өрт өчүрүүчү машина жана 70тей өрт өчүрүүчү тартылганын билдирди. Миңдеген үйлөр жарыксыз калып, 150дөй адам эвакуацияланган.

Социалдык тармактарда бөлүшүлгөн сүрөттөрдө мекемеден чоң жалын жана коюу түтүн булуттары көтөрүлүп жатканын көрүүгө болот. Комиссардын жардамчысы Пэт Гулбурн: «Өрт көп сандаган үйлөргө жана жергиликтүү ишканаларга электр энергиясынын өчүрүлүшүнө алып келди жана биз үзгүлтүккө учураууну азайтуу үчүн өнөктөштөрүбүз менен тыгыз иштешип жатабыз»,-деди.

Шотландиялык жана Түштүк электр тармактары X платформасындагы билдирүүсүндө электр жарыгынын өчүрүлүшү 16,300дөн ашык үйгө таасирин тийгизгенин билдирди.

Окуя болгон жерге бейшемби күнү саат 23.23тө тез жардам бригадалары чакырылган. Өрттүн келип чыгуу себептери азырынча тактала элек. Гулбурн адамдарды коопсуздук чараларын көрүүгө жана өрттү өчүрүү үчүн экипаждар иштеп жаткан аймактан алыс болууга үндөдү.

 FlightAware сайты Хитроуга бир нече каттамдар токтотулганын көрсөттү. Алардын арасында Нью-Йорктогу Джон Кеннеди эл аралык аэропортунан Delta Airlines жана American Airlines авиакомпанияларынын учуусу жана Вашингтон Даллес эл аралык аэропортунан United Airlines учагы бар.

Хитроу адатта түнкү каттамга чектөөлөр киргизилгендиктен эртең мененки саат 6да каттамдарды ачат. Бирок жума күнү саат 23.59га чейин жабыла турганы айтылды.

Улуу Британиянын өкмөтү жыл башында экономиканы жана дүйнө менен байланышты көтөрүү максатында аэропортко үчүнчү учуу тилкесин курууну жактырган.