Глобалдык Сумуд флотилиясы Газага карай багыт алган кемелеринин жапыз учкан учкучсуз учуучу аппараттар, жарылуулар жана байланыш үзгүлтүктөрү себептүү басым астында болгонун жарыяласа, активисттер болсо гуманитардык миссиясын таштабай турганын баса белгилешти.
Активист топ социалдык медиада бөлүшүлгөн билдирүүсүндө бул окуяларды конвойду коркутууга багытталган «психологиялык операциялар» деп мүнөздөдү.
"Жардыруулар, белгисиз учкучсуз учуучу аппараттар жана байланыш үзгүлтүктөрү: Биз бул психологиялык операцияларды өз башыбыздан өткөрүп жатабыз, бирок коркпойбуз", — деп айтылат билдирүүдө.
Билдирүүдө ошондой эле: «Израиль жана анын союздаштарынын Газадагы ачарчылык жана үрөйдү учурган геноцид кылмыштары чындап эле жийиркеничтүү. Бирок биздин чечкиндүүлүгүбүз болуп көрбөгөндөй күчтүү. Бул тактикалар бизди Газага жардам жеткирүү жана мыйзамсыз блокаданы бузуу миссиябыздан баш тарттыра албайт. Бизди коркутуу үчүн жасалган ар бир аракет биздин жолубузду бекемдейт»,деп айтылган.
Активист топ учурда флотилия эл аралык сууларда гуманитардык миссиясын аткарып жатканын билдирди.
Топ:«Аймакта ондогон учкучсуз учуучу аппараттар байкалды. Эки парустук кеме учкучсуз учуучу аппараттар менен бутага алынды, бирок баары коопсуз жана эч ким жабыркаган жок. Учурда байланыш үзгүлтүккө учурап жатат, бул координациялоо жана жооп берүү жөндөмүбүзгө таасир этиши мүмкүн»,-деп кошумчалады.
Флотилия өзүнүн «Алма» аттуу кемелеринин бирөөнүн үстүнөн дүйшөмбү күнү бир нече саат бою 15тен ашык учкучсуз учуучу аппараттарды көргөнүн билдирди.
Уюмдун айтымында, учкучсуз учуучу аппараттар «болжол менен ар бир 10 мүнөт сайын» пайда болуп, чалгындоо маалыматын чогултуу жана экипажды коркутуу үчүн колдонулган.
Блокаданы бузуу
Гуманитардык жардам ташыган ондогон кайыктардан турган кербен Израилдин мыйзамсыз блокадасына каршылык көрсөтүү үчүн Палестинанын Газа аймагына жетүүнү максат кылууда. Укук коргоочу уюмдар жана Бириккен Улуттар Уюму блокаданы жамааттык жазалоонун бир түрү катары сыпатташууда.
Глобалдык Сумуд флотилиясы гуманитардык кызматкерлер жана уюштуруучулар менен кошо эл аралык активисттер тарабынан уюштурулган. Бул акция Газадагы гуманитардык кырдаалды ачыкка чыгарууга багытталган тынчтык аракети катары сыпатталууда.
Израилдин бийликтери флотилия же учкучсуз учуучу аппараттар, жарылуулар же байланыш үзгүлтүктөрү тууралуу маалымат боюнча ачык комментарий бере элек.
