Украина өлкө боюнча чоң зыян келтирген орусиялык чабуулдардан кийин Бириккен Улуттар Уюмунун Коопсуздук Кеңешинин чукул жыйынын өткөрүүнү суранды. Кол салуулардын арасында тарыхый монастырга багытталган чабуулдар болгону кабарланды.
Дүйшөмбү күнү Киев өкмөтү чабуулдар ЮНЕСКОнун Дүйнөлүк мурастар тизмесине кирген жана Украинанын эң маанилүү диний жана маданий символдорунун бири болгон Печерск Лавра монастырь комплексиндеги Успен соборуна олуттуу зыян келтиргенин жарыялады.
Украинанын тышкы иштер министри Андрей Сибиха ошондой эле Европадагы коопсуздук жана кызматташтык уюму (ЕККУ), Европа Кеңеши жана ЮНЕСКО менен биргеликте аракеттерди баштады.
Сибиха чабуулдар Киев, Харьков, Днепр жана башка шаарларды бутага алып, жайкын тургундар менен өзгөчө кырдаалдар кызматкерлеринин өлүмүнө жана балдардын жаракат алышына алып келгенин билдирди.
Сибиха өзүнүн X аккаунтундагы билдирүүсүндө: "Орусия элибизге, шаарларыбызга, маданий жана диний мурастарыбызга кол салып эл аралык укукту жана Бириккен Улуттар Уюму коргоо үчүн түзгөн принциптерди толугу менен этибарга албаганын көрсөтүүдө", - деп жазды.
Сибха Москвага кысымды күчөтүү керектигин айтып, эл аралык коомчулуктан катуу жооп кайтарууга чакырды.
Өз ара айыптоолор
Буга чейин Москва менен Киев бири-бирин түн ичинде жасалган ири масштабдуу ракеталык жана дрондук чабуулдар үчүн айыпташкан. Эки тарап тең инфраструктуралык объектилерге жана жарандык конуштарга зыян келтирилгенин билдиришкен.
Украиналык расмий өкүлдөр кол салууларда кеминде 5 адам каза болуп, 25 адам жаракат алганын маалымдашты.
Украинанын айыптоолоруна жооп катары Орусиянын Коргоо министрлиги жекшемби күнү кечинде сокку урулган деп ырастаган буталардын тизмесин жарыялады.
Министрлик Киев-Печерск Лаврасындагы зыян Украинанын абадан коргонуу системалары учурган Patriot ракетасынан улам келип чыкканын билдирди.
