Ак үйдүн билдирүүсүнө караганда, президент Дональд Трамп АКШны ондогон эл аралык уюмдардан, анын ичинде Бириккен Улуттар Уюмунун агенттиктеринен чыгаруу жөнүндө меморандумга кол койду.
"Бүгүн президент Дональд Ж. Трамп Американын кызыкчылыктарына кызмат кылбай калган 66 эл аралык уюмдан АКШны чыгарууну көздөгөн Жарлыкка кол койду; алардын арасында БУУга кирбеген 35 мекеме жана БУУнун 31 агенттиги бар",- деп айтылат Ак үйдүн шаршемби күнкү билдирүүсүндө.
Ак үй уюмдардын тизмесин берген жок, бирок булар "АКШнын эгемендүүлүгүнө жана экономикалык күчүнө карама-каршы келген радикалдуу климаттык саясатты, глобалдык башкарууну жана идеологиялык программаларды" колдой турганын билдирди.
Билдирүүдө бул кадам АКШ мүчөсү же катышуучусу болгон бардык эл аралык өкмөттөр аралык уюмдарды, конвенцияларды жана келишимдерди карап чыгуунун натыйжасында жасалганы кошумчаланды.
Ак үй: "Бул чыгуулар АКШнын салык төлөөчүлөрүнүн каржылоосун, АКШнын артыкчылыктарынан глобалдык күн тартибин артык көргөн же маанилүү маселелерди натыйжасыз жана таасирсиз түрдө караган уюмдарга катышуусун токтотот, ушундайча АКШнын салык төлөөчүлөрүнүн акчасы бул миссияларды колдоо үчүн башка жолдор менен натыйжалуураак колдонулушу мүмкүн", - деп билдирди.
Бир жыл мурун экинчи президенттик мөөнөтүн баштаган Трамп АКШнын БУУга каржылоосун кыскартууга, АКШнын БУУнун Адам укуктары боюнча кеңеши менен байланышын токтотууга, Палестинанын UNRWA уюмуна каржылоону кыскартууну узартууга жана БУУнун маданий агенттиги ЮНЕСКОдон чыгууга аракет кылып келет. АКШ президенти ошондой эле Дүйнөлүк саламаттыкты сактоо уюмунан жана климаттын өзгөрүшү боюнча Париж келишиминен чыгуу планын жарыялады.
