АКШнын Түштүк командирлигинин (SOUTHCOM) билдирүүсүнө ылайык, АКШ Тынч океандын чыгышында баңгизат ташууга шектелген эки кемеге чабуул жасады.
Командирлик операция бейшемби күнү коргоо министри Пит Хегсеттин көрсөтмөсү менен эл аралык сууларда Southern Spear аттуу биргелешкен атайын топ тарабынан жүргүзүлгөнүн кабарлады.
АКШнын Түштүк командирлиги X баракчасында: "Чалгындоо кызматы кемелердин Тынч океандын чыгышында баңгизат ташып баратканын жана баңгизат аткезчилиги менен алектенгенин тастыктады", - деп билдирди.
Билдирүүдө ошондой эле: "Бул аракеттер учурунда жалпысынан беш эркек наркотеррорист өлтүрүлдү, алардын үчөө биринчи кемеде, экөө экинчисинде. АКШнын эч бир аскер кызматкери жабыркаган жок", - деп кошумчаланды.
Бул акыркы чабуулдар АКШнын аскерлери бир күн мурун баңгизат ташыган деп шектелген дагы бир кемеге кол салып, төрт адамдын өмүрүн алгандан кийин болду.
Бул жаңы кол салуулар менен АКШнын Кариб деңизиндеги жана Тынч океандын чыгышындагы операцияларында каза болгондордун саны 104кө жетти.
