АКШнын президенти Дональд Трамп Украинага “согуштук чектерде токтоп”, Орусия менен болгон согушту токтотууну сунуштады. Ал Киевди учурдагы аймактык абалды келечектеги сүйлөшүүлөрдүн негизи катары кабыл алууга чакырды.
Жекшемби күнү Вашингтонго кайтып келе жатканда журналисттерге маалымат берген Трамп жума күнү Украинанын президенти Владимир Зеленский менен “жагымдуу” жолугушуу өткөргөнүн жана Киевге Донбасстын бүт аймагын Москвага өткөрүп берүү тууралуу сунуш айтпаганын билдирди.
“Жок, биз бул тууралуу эч качан сүйлөшкөн эмеспиз,” – деди ал.
Трамп ошондой эле: “Алардын кылышы керек болгон нерсе, бул согуштук чектерде токтоп калуу”,-деп кошумчалады.
Ал Донбасстагы абал тууралуу сөз кылып: “78 пайыз жер Орусия тарабынан ээленип калган,” – деп, Украина кийинчерээк сүйлөшүүлөрдү жүргүзө аларын, бирок азыркы учурда согушту токтотуу эң башкы маселе экенин белгиледи.
Донбасстын аймагы, анын ичинде Донецк жана Луганск, 2014-жылдан бери жаңжалдын негизги очогу болуп келет. Ошол жылы Орусиянын колдоосундагы жикчилдер Крымдын аннексиясынан кийин өз алдынча республикаларды жарыялашкан.
Кийинчерээк Орусиянын күчтөрү 2022-жылдын февраль айында башталган “атайын операциядан” кийин аймактын көп бөлүгүн өз көзөмөлүнө алган.
