Бириккен Улуттар Уюмунун тергөөчүлөрүнүн айтымында, Израилдин палестиналык балдарды атайылап бутага алышы Газада жүргүзүлүп жаткан геноциддин негизги элементине айланган.
БУУнун Көз карандысыз Эл аралык Иликтөө Комиссиясы «палестиналык балдар Израилдин коопсуздук күчтөрү тарабынан атайылап бутага алынып, өлтүрүлүп жатканы» тууралуу далилдерди тапканын жарыялады.
БУУнун атынан сүйлөгөн үч кишиден турган тергөө тобу өткөн сентябрдагы отчетунда Израиль Газага каршы согушта геноцид жасап жатканын биринчи жолу аныкташкан.
Акыркы кошумча отчетто Израилдин аскердик операцияларынын интенсивдүүлүгү жана системалуу мүнөзү уланып жатканы, бул палестиналык балдардын арасында «болуп көрбөгөндөй» өлүмгө, жаракат алууга жана травмага алып келери айтылган.
Расмий өкүлдөр Израиль бийликтери жана коопсуздук күчтөрү Газада «геноцид кылмышын жасоону улантып жатышат» деген тыянак чыгарууга «акылга сыярлык негиздер» бар экенин билдиришти.
Газада балалык «жок кылынды»
БУУнун Адам укуктары боюнча кеңеши тарабынан 2021-жылы түзүлгөн комиссия оор физикалык жана психикалык жаракаттар, массалык травма, жетимдик, үй-бүлөдөн ажырап калуу, майыптык, кайталап көчүрүү, ачкачылык жана билим берүү жана саламаттыкты сактоо системаларынын кыйрашы Газада «балалыкты жок кылганын» жана аймактагы балдарга өмүр бою таасирин тийгизе турганын билдирди.
Тергөө комиссиясынын төрагасы болгон индиялык судья Шринивасан Муралидхар: «Балдарды бутага алуу менен Израиль Палестина элинин жашоо жана келечегин аныктоо жөндөмүнө кол салууда. 2025-жылдын октябрындагы ок атышууну токтотуудан кийин да балдар өлтүрүлүп, оор жаракат алууда», - деп билдирди.
