Түркия, Египет, Индонезия, Иордания, Пакистан, Катар, Сауд Арабиясы жана Бириккен Араб Эмирликтеринин (БАЭ) тышкы иштер министрлери Батыш Шериадагы палестиналыктардын жерлерин басып алган израилдиктердин палестиналыктарга кол салуулары боюнча биргелешкен жазуу жүзүндөгү билдирүү жасашты.

Билдирүүгө ылайык, тышкы иштер министрлери «басып алынган Батыш Шериадагы палестиналыктарга каршы уланып жаткан жана күчөп бараткан отурукташкандардын зомбулугун», анын ичинде Рамалланын түндүгүндөгү Жилчилья айылындагы Улуу мечитке жана Мезра ан-Нубани айылындагы Аль-Фарук мечитине жакында жасалган кол салууларды кескин айыпташты.

Министрлер бул кол салуулар сыйынуу жайларынын жана ыйык жерлердин кол тийбестигин, эл аралык укукту, анын ичинде эл аралык гуманитардык укукту жана Бириккен Улуттар Уюмунун тиешелүү резолюцияларын ачыктан-ачык бузуу болуп саналаарын баса белгилешти.

Министрлер ошондой эле Палестина аймактарын басып алып жаткан израилдиктердин кол салууларын жана басып алынган Палестина аймактарында туруксуздукту, зомбулукту жана экстремизмди күчөтүп, тынчтыкка жетүү боюнча эл аралык аракеттерге тоскоол болгон мыйзамсыз Израилдин чараларын улантууну кескин айыпташаарын билдиришти. 

Министрлер бул кол салуулар үчүн «басып алуучу держава Израилди» жооптуу деп эсептей тургандыктарын баса белгилешти.

Тышкы иштер министрлери эл аралык коомчулукту өзүнүн укуктук жана моралдык милдеттерин аткарууга жана Израилди оккупацияланган Батыш Шериадагы кооптуу чыңалууну токтотууга, мыйзамсыз аракеттерин токтотууга, отурукташкандардын зомбулукка чекит коюуга, бул кылмыштар үчүн жооптууларды жоопкерчиликке тартууга жана жооптуулар жазасыз калбашы үчүн кам көрүүгө мажбурлоого чакырыктарын кайталашты.