Түркия менен Улуу Британия Анкарада өткөн дипломатиялык сүйлөшүүлөрдө Сирияга карата санкциялардын шартсыз алып салынышын өзгөчө каржылык агымдардын калыбына келтирилиши максатында талкуулашты.

Түрк дипломатиялык булактарынан алынган маалыматка караганда, дүйшөмбү күнкү жыйынга Түркиянын тышкы иштер министринин орун басары Нух Йылмаз менен Улуу Британиянын Жакынкы Чыгыш, Түндүк Африка, Ооганстан жана Пакистан боюнча мамлекеттик министри Хамиш Фалконер жетекчилик кылды.

Сүйлөшүүлөрдө Сирия жана башка аймактык маселелер каралды. Йылмаз Сириянын коопсуздук, гуманитардык жана экономикалык абалына байланыштуу Түркиянын баалоолорун бөлүшүп, кризисти чечүү үчүн комплекстүү мамиленин зарылдыгын билдирди.

Улуттук макулдашуу аракеттерине колдоо көрсөтүүнүн маанилүүлүгүн баса белгилеп, бөлүнүүчүлүк кыймылдардын бул процессте орун албашы керектигин кайталады.

Йылмаз ошондой эле Сириянын кайрадан курулушу жана экономикалык өнүгүүсү темасын сүйлөштү. “Санкцияларды шартсыз жана толук алып салуу, өзгөчө өлкөгө каржылык агымдарды камсыз кылуу темасы көтөрүлдү”, - деп билдиришти булактар.

Түркия менен Улуу Британия Сирия жана башка аймактык маселелер боюнча консультацияларды улантууга макулдашышты.

Бул жыйын декабрь айында Башар Асад режими кулагандан кийин Сирияны азыр Ахмед Альшараа жетектеген убактылуу өкмөттүн башкаруусунда турган учурга туш келди.