Украинанын президенти Владимир Зеленский коопсуздук жана укуктук шарттар камсыздалса, 60-90 күндүн ичинде президенттик шайлоо өткөрүүгө "даяр" экенин билдирип, АКШ менен Европа өнөктөштөрүнөн согуш маалында добуш берүү үчүн керектүү шарттарды түзүүгө колдоосун суранды.
Бул билдирүү АКШнын президенти Дональд Трамп шейшемби күнү теманы күн тартибине койгондон кийин айтылды.
Зеленский Римде журналисттерге бул теманын АКШнын расмий өкүлдөрү менен акыркы сүйлөшүүлөрүндө талкууланбаганын жана шайлоолорго байланыштуу чечимдер украиналыктарга гана тиешелүү экенин баса белгиледи.
Киев саясий себептерден улам добуш берүүдөн качып жатат деген дооматтарды четке каккан Зеленский согуштун уланышы бийликте ким турганы менен байланыштуу эместигин айтты.
Украинанын лидери Орусиянын чабуулдарына карабастан коопсуз шарттарды түзүүдөн тышкары, мыйзамдуулукту камсыз кылуу жана фронттогу аскерлердин катышуусуна мүмкүндүк берүү үчүн укуктук чаралар зарыл экенине басым жасады.
Зеленский АКШ жана Европа өнөктөштөрүнөн Украинага зарыл коопсуздук чөйрөсүн түзүүгө жардам берүүнү суранып, бул колдоо менен өлкө эки-үч айдын ичинде шайлоо өткөрүүгө даяр болушу мүмкүн экенин айтты.
Зеленский ошондой эле шайлоого катышууга толук даяр экенин жана мыйзам чыгаруучулардан согуш учурунда шайлоолорду өткөрүүгө мүмкүндүк берүүчү түзөтүүлөрдү иштеп чыгууну талап кылганын кошумчалады.
Ал Киевге кайтып келгенден кийин өнөктөштөрдөн жана парламенттен түшкөн сунуштарды карап чыгаарын да билдирди.
Украинанын тынчтык планы
Коопсуздук маселелерине токтолгон Зеленский Киев шаршемби күнү Вашингтонго акыркы тынчтык планын тапшыраарын ырастады.
Украина лидери ошондой эле анын өлкөсү Нептун, Палянится, Фламинго жана Сапсан ракеталары сыяктуу узак аралыкка учуучу системаларды жайгаштырганын айтты.
Крым тууралуу Зеленский учурда жарым аралды кайра алууга аскердик кубат жетпестигин моюнга алды.
Трамптын комментарийлерине жооп катары ал: «Балким мен муну биринчи жолугушуубузда айткандырмын жана менин оюмча туура айткам. Ооба биз азыр булардын баарын жасоого күчүбүз жетпейт. Бул үчүн жетиштүү колдоо жок» деди.
Эгер Орусия "энергетикалык ок атышпоого даяр болсо" муну карап көрүүгө даяр экенин кошумчалаган Зеленский энергетикалык туруктуулуктун "эл үчүн маанилүү" экенин айтты.
Украина президенти Европа менен байланышкан тынчтык планынын элементтери, анын ичинде тоңдурулган орусиялык активдер жана Украинанын Евробиримдикке мүчөлүгү "Европа тарабынан кабыл алынышы керек" экенин баса белгиледи.
