Түркия Түндүк Атлантика Келишими Уюмунун (НАТО) коопсуздук чараларынын алкагында Литвага убактылуу түрдө эскертүү жана көзөмөл учагын жайгаштырды. Коргоо министрлиги бул кадам орус учкучсуз аппараттары НАТО союздаштарынын аба мейкиндигин бир нече жолу бузгандан кийин жасалганын кабарлады.

Литва, Эстония, Дания жана Польша акыркы апталарда Орусиянын дрондору же согуштук учактары алардын аба мейкиндигин бузганын билдиришти. Бул окуялар НАТО альянсынын Европанын чыгыш тарабындагы коргонуу чараларын күчөтүүсүнө түрткү болду.

Коргоо министрлигинин бейшемби күнү жарыяланган апталык пресс-релизинде «НАТОнун ишеним чараларынын алкагында биздин абадан эскертүү жана көзөмөл системасы (AWACS) 22-сентябрдан 25-сентябрга чейин Литванын аба мейкиндигинде миссияларды аткарууда», – деп айтылды.

AWACS учактары жердеги радарлар байкай албаган төмөн учкан дрондорду жана башка объектилерди аныктоого жөндөмдүү.

Польша айрым дрондорду атып түшүргөнүн жарыяласа, шейшембиде Литванын парламенти куралдуу күчтөрүнө аба мейкиндигин бузган учкучсуз аппараттарды атып түшүрүүгө уруксат берди.

Батыштагы расмий өкүлдөр Орусия бул аба мейкиндигин бузуу аракеттери менен НАТОнун даярдыгын жана чечкиндүүлүгүн сыноодо деп эсептешет. Эстония жана Польша альянсты НАТО келишиминин 4-беренесинин негизинде консультацияларды баштоого чакырышты.

4-беренеде НАТОго мүчө мамлекеттердин аймагы, саясий көз карандысыздыгы же коопсуздугу коркунучка кабылган учурда алар биргелешип консультация өткөрүшү керектиги айтылат.