Түркия менен Пакистан Түштүк Азия өлкөсүндөгү 40 блокто деңизде мунай жана газ чалгындоо үчүн биргелешкен тендерге кол коюшту.
Биргелешкен тендердик келишимге шейшемби күнү Пакистандын борбору Исламабадда өткөн Пакистан Тоо-кен инвестиция форуму-2025 учурунда кол коюлду. Бул маалымат Пакистандын Мунай министрлиги тараткан билдирүүдө бөлүшүлдү.
Пакистан өкмөтү, февраль айында Макран жана Инд бассейндериндеги 40 блокту камтыган тендерди өткөрүү аркылуу геологиялык чалгындоо иштерине лицензия берүү мүмкүнчүлүгүн жарыялаган.
“Бул тендердик айлампа өлкөнүн энергетика секторуна жогорку деңгээлдеги түз чет элдик инвестицияларды (FDI) тартуу үчүн маанилүү мүмкүнчүлүк болуп саналат”, - деп айтылат билдирүүдө.
Пакистандын Mari Energies Limited, Oil and Gas Development Company Limited жана Pakistan Petroleum Limited компаниялары түрк мамлекеттик мекемеси Turkish Petroleum Corporation (TPAO) менен оффшордук тендерге биргелешип катышуу үчүн келишимге кол коюшту.
“Бул стратегиялык кызматташтык Пакистанга зарыл болгон чет элдик инвестицияларды алып келет жана өлкөнүн деңиз аймактарындагы колдонулбаган мүмкүнчүлүктөрдү изилдеп пайдалануу үчүн эл аралык технологияларды, тажрыйбаларды жана көндүмдөрдү бөлүшүүгө, ишке ашырууга жол ачат деп ишенебиз”, - деп айтылат билдирүүдө.
Кол коюу аземине Түркиянын энергетика жана жаратылыш ресурстары министри Алпарслан Байрактар менен Пакистандын мунай министри Али Перваиз Малик катышты.
Пакистан-Түркия кызматташтыгына чоң үмүт артып жатканын билдирген Малик Исламабаддын бул демилгеге «толук колдоо» көрсөтүүгө даяр экенин жана деңиздеги коруктарды изилдөө боюнча мындай биргелешкен аракеттерди «күчтүү түрдө кубаттай турганын» айтты.
Байрактар Исламабад тарабынан уюштурулган Тоо-кен инвестиция форумуна жогору баа берди.
