Түркия Республикаснын Президенттигинин коммуникация башкармалыгынын башчысы Фахреттин Алтун Анкаранын сириялык эл менен тынчтык жана тилектештикке болгон берилгендигин дагы бир жолу баса белгилеп, эки элдин ортосундагы мамиле география менен эле чектелбестен алда канча терең экенин, маданий, тарыхый жана диний байланыштарга негизделгенин айтты.
Шейшемби күнү Дамаскта өткөн “Тынчтык жана туруктуулук жолундагы кызматташтык: Түркия-Сирия бир туугандыгы” аттуу панелге жөнөткөн билдирүүсүндө Алтун, Баас режими учурунда да бул бир туугандык мамиле сакталып калганын белгиледи. Ал режим сириялык элге “өлчөөсүз азаптарды” алып келгенин айтты.
Алтун: “Жүз миңдеген адамдардын өмүрүн алган жана акыркы тарыхтагы эң оор гуманитардык кризистердин бирин жараткан Баас режими акыры аяктады,” – деди. Алтун ошондой эле: “Мен ишенем, сириялык эл азыр гүлдөгөн, тынч жана үмүттүү келечекке карай кадам таштап жатат”,-деп кошумчалады.
Алтун Түркиянын тарых бою басмырланган элдердин жанында турган бекем позициясын баса белгилеп, Сириянын эң оор жылдарында да бул колдоону көрсөтүп келгенин айтты. Ал президент Режеп Таййип Эрдогандын сириялыктарга болгон туруктуу колдоосун да мактады.
Алтун Түркиянын согуш учурундагы кеңири жардамын, анын ичинде гуманитардык жардам, саламаттыкты сактоо, билим берүү жана жер которгон сириялыктар үчүн жашоо шарттарын жакшыртуу боюнча аракеттерин белгиледи. AFAD, Түрк Кызылайы жана ТИКА сыяктуу уюмдар бул иштерде негизги ролду ойногонун кошумчалады.
Ар түрдүү тармактарда кызматташтыкты кеңейтүү
Сирия өз келечегин өзү аныктай ала турган эркин өлкө болушу керектигин баса белгилеген Алтун, бардык тармактарда кызматташтыкты тереңдетүү боюнча аракеттер уланып жатканын айтты.
“Дамаскта элчилигибиз кайра ачылгандан кийин, эми Халептеги консулдугубуз иштеп жатат. Түрк аба жолдору Сириянын борборуна каттамдарын кайра баштады,” – деди ал. Ошондой эле, жарандык авиация, соода, саламаттыкты сактоо жана энергетика тармактарындагы эки тараптуу кызматташтык күчөп жатканын кошумчалады.
Алтун медиа, коммуникация, коомдук дипломатия жана жалган маалыматтарга каршы күрөшүү боюнча биргелешкен аракеттердин маанилүүлүгүн белгилеп, Сириянын Маалымат министрлиги менен тыгыз координация жүрүп жатканын айтты. Ал бул панел эки элдин ортосундагы байланышты бекемдөөгө жардам берет деген ишенимин билдирди.
Иш-чарага окумуштуулар, журналисттер, бейөкмөт уюмдар, расмий өкүлдөр жана эл аралык катышуучулар чогулушту. Талкууларда медиа, байланыш жана Сириядагы коомдук биримдикти калыбына келтирүү сыяктуу негизги тармактардагы эки тараптуу кызматташтыктын келечеги каралды.
Панель Түркиянын Коммуникация башкармалыгы тарабынан даярдалган “Сирия жаңжалы: Түркиянын тынчтык дипломатиясы” аттуу даректүү тасманы көрсөтүү менен жыйынтыкталды.
