Түркиянын Коммуникация башкармалыгынын төрагасы Фахреттин Алтун 2025-жылдын 20-июнунда Армениянын премьер-министри Никол Пашиняндын Түркияга иш сапары менен келерин X платформасынан жарыялады.
Сапардын алкагында президент Режеп Таййип Эрдогандын Стамбулда Пашинянды кабыл алуусу күтүлүүдө. Алтун билдирүүсүндө: «Армениянын премьер-министри Никол Пашинян 2025-жылдын 20-июнунда өлкөбүзгө иш сапары менен келет. Президентибиз Режеп Таййип Эрдоган Пашинянды Стамбулда кабыл алат»,-деди.
Бул сапар Армения Республикасынан бир мамлекет башчысынын Түркияга мындай деңгээлде биринчи жолу келиши маанилүү бурулуш жери катары каралууда.
Армения парламентинин спикери Ален Симонян бул жолугушуунун маанисин баса белгилеп: “Бардык аймактык маселелер талкууланат”,- деп билдирди.
Симонян ошондой эле Азербайжан менен болгон чыңалууга байланыштуу тынчсызданууларга токтолуп: “Азыркы учурда Азербайжан менен согуш коркунучу минималдуу жана биз бул коркунучтарды жок кылуу үчүн иштешибиз керек. Пашиняндын Түркияга сапары ушул багыттагы кадам болуп саналат”, – деп кошумчалады.
Бул сапар эки өлкөнүн дипломатиялык мамилелерди жакшыртуу жана узак убакыттан бери уланып келе жаткан аймактык чыр-чатактарды чечүү аракеттерин көрсөтөт. Байкоочулар бул сапарды Түштүк Кавказ аймагындагы чыңалууну азайтууга карата үмүт берүүчү деп баа беришүүдө.
Бейшемби күнү, Пашиняндын сапарынан бир күн мурун Азербайжандын президенти Илхам Алиев Түркияга келип, Эрдоган менен сүйлөшүүлөрдү жүргүздү жана түрк-азербайжан альянсын “аймактык гана эмес, глобалдык мааниге ээ маанилүү фактор” деп мүнөздөдү.
Эрдоган “Азербайжан менен Армениянын ортосунда тынчтык орнотуу” боюнча колдоосун дагы бир жолу билдирди.
Пашинян буга чейин Түркияга бир гана жолу, 2023-жылы Эрдогандын кызматын баштоо аземине катышуу үчүн келген. Ал кезде Түркиянын президентин кайра шайланышы менен куттуктаган алгачкы чет элдик лидерлердин бири болгон.
Анкара менен Ереван 2021-жылдын аягында атайын өкүлдөрдү дайындап, нормалдаштыруу процессин башташкан. Бул процесс Армениянын Азербайжан менен Карабах аймагындагы согушта жеңилгенден бир жылдан кийин башталган.
2022-жылы Түркия менен Армения эки жылдык тыныгуудан кийин коммерциялык каттамдарды кайра башташты.
