Бельгия, Мальта, Андорра, Монако жана Люксембург Нью-Йоркто өткөн эл аралык конференцияда Палестина мамлекетин расмий тааныгандарын жарыялап, таануу тууралуу чечим кабыл алган мамлекеттердин тизмесине кошулушту.
Үч өлкөнүн лидерлери БУУнун Башкы Ассамблеясынын алдында Палестина жана эки мамлекеттүү чечим боюнча өткөн жыйында өз билдирүүлөрүн жасашты. Бул кадам делегаттар тарабынан колдоого алынып, Палестина мамлекетин эл аралык деңгээлде таануу аракетине дем берген чечим катары бааланды.
“Бул таануу биздин тынчтык жана адилеттүүлүккө болгон бекем ишенимибизди, ошондой эле палестиналыктардын өз алдынча чечим кабыл алуу укугун колдоорубузду чагылдырат,” – деп билдирди Мальтанын премьер-министри.
Люксембургдун премьер-министри муну “тарыхый кадам” деп мүнөздөсө, Бельгия бул кадамды эки мамлекеттүү чечимди сүйлөшүү жолу менен ишке ашыруу боюнча узактан бери жүргүзүлүп келе жаткан колдоосуна шайкеш келгенин билдирди.
Франциянын президенти Эммануэль Макрон да буга чейин ошол эле жыйында Палестинаны таануу чечимин кабыл алганын жарыялаган. “Бүгүн Франциянын Палестина мамлекетин тааныганын жарыялайм,” – деди жана мунун Израилдин тынчтыкта жашоосуна мүмкүнчүлүк бере турган жалгыз чечим экенин айтты.
Макрон бул чечимдин шашылыш экенин, анткени Израилдин Газага жасаган геноциди улантылып жатканын белгиледи. “Согушту, Газадагы бомбалоолорду, массалык өлтүрүүлөрдү жана качкындардын агымын токтотуунун убактысы келди. Газада уланып жаткан согушту эч нерсе актай албайт,” – деди.
Көбөйгөн колдоо
Макрон Палестинаны тааныган башка өлкөлөргө, анын ичинде Андорра, Австралия, Канада, Монако, Португалия, Улуу Британия жана Сан-Марино сыяктуу мамлекеттерге ыраазычылык билдирди. Таануунун “пайдалуу сүйлөшүүлөргө жол ачарын” айткан Макрон, араб жана мусулман мамлекеттерин Палестина мамлекети түзүлгөндөн кийин Израиль менен мамилелерди нормалдаштырууга чакырды.
Макрон Франция “Газадагы бардык туткундар бошотулуп, ок атышпоо келишими түзүлөөр замат” Палестинада элчилигин ача аларын жана Париж эл аралык стабилдештирүү миссиясына салым кошууга даяр экенин кошумчалады.
Франция жана Сауд Арабия тең төрагалык кылган бул конференция июль айында өткөрүлгөн ушундай эле жыйындын уландысы болду. АКШ жана Израиль бул жыйынга катышкан жок.
