Түркия Жаңы Зеландиядагы чабуулдун жылдыгында мусулмандарды жек көрүүгө каршы күрөшөөрүн билдирди
2019-жылы австралиялык ак үстөмдүк идеологиясын карманган террористтин террордук чабуулунда Крайстчерч шаарындагы Ал Нур мечити жана Линвуд Ислам борборунда 51 адам каза болуп, 40дан ашык адам жаракат алган.
Жаңы Зеландиянын Крайстчерч шаарындагы эки мечитке жасалган террордук чабуулдун алтынчы жылдыгына карата Түркия Исламофобияга жана мусулмандарга карата жек көрүүчүлүккө каршы күрөшүү боюнча өз милдеттенмесин билдирди.
“Түркия Исламга каршы жек көрүүчүлүктү жоюуга багытталган бардык демилгелерди колдоого бекем даяр,” – деп ишемби күнү Түркиянын Тышкы иштер министрлиги Исламофобияга каршы күрөшүү эл аралык күнү боюнча билдирүү жасады.
Билдирүүдө, Исламофобиянын бир гана мусулмандарга эмес, эл аралык тынчтык жана коомдук ынтымакка да чоң коркунуч туудурганы айтылды жана кол салууда каза болгон 51 киши эскерилди.
“Ислам баалуулуктарына жасалып жаткан тынымсыз чабуулдар эл аралык коомчулуктун Исламга каршы жек көрүүчүлүккө каршы күрөшүү аракеттерин күчөтүү зарылдыгын көрсөтүүдө,” – деп билдирүүдө кошумчаланды.
2019-жылдын 15-мартында австралиялык ак үстөмдүк идеологиясын карманган террорист Брентон Таррант Крайстчерч шаарындагы Аль-Нур мечитинде жана Линвуд Ислам борборунда 51 адамды өлтүрүп, дагы 40 адамды жарадар кылган.
Ал 2020-жылы шарттуу түрдө бошотуу мүмкүнчүлүгү жок өмүр бою түрмөгө кесилген, бул Жаңы Зеландияда биринчи жолу чыккан мындай өкүм болгон.