АКШнын президенти Дональд Трамп бир нече аптага созулган аймактык кагылышуудан жана АКШ колдогон Иран-Израиль ок атышпоо келишиминен кийин АКШ Иран менен сүйлөшүүлөрдү пландаштырганын билдирди.
Трамп дүйшөмбү күнү Ак үйдө Израилдин премьер-министри Биньямин Нетаньяху менен биргелешкен маалымат жыйынында журналисттерге: "Биз Иран менен сүйлөшүүлөрдү пландаштырганбыз. Алар дагы сүйлөшкүсү келет" деди.
“Алар жыйын өткөрүүнү суранышты... эгерде биз кагазга бир нерсе түшүрө алсак, бул жакшы болот. Эмне болорун көрө жатарбыз”, – деп кошумчалады.
Трамптын Жакынкы Чыгыш боюнча атайын өкүлү Стив Уиткофф жыйын “кийинки жумада же андан кийин” өтөрүн тастыктады.
АКШнын Иранга дагы бир аскердик сокку уруу планы барбы деген суроого Трамп: “Мындай кылууга аргасыз калбайбыз деп үмүттөнөм. Андайды элестете албайм. Алар да андай кылууну каалабайт деп ойлойм. Сүйлөшүүнү каалап жатышат... бир нерсени чечүүнү каалашат”, – деп жооп берди.
Бул билдирүү АКШнын B-2 бомбалоочу учактары Ирандын Фордо жана Натанз ядролук объектилерине 14 GBU-57 “бункер бомбаларын” таштап, Томагавк канаттуу ракеталары менен Исфахан объектилерине сокку ургандан эки жума өткөндөн кийин айтылды.
Бул чабуулдар АКШнын Ирандын ядролук программасына каршы кеңири кампаниясынын бир бөлүгү эле.
АКШ-Иран сүйлөшүүлөрүнүн алтынчы айлампасы алгач 15-июнга белгиленген, бирок Израиль 13-июнда Ирандын аскерий, өзөктүк жана жарандык объектилерине эч кандай себепсиз абадан сокку ургандан кийин үзгүлтүккө учураган.
12 күнгө созулган салгылашуудан кийин 24-июнда ок атышпоо келишими түзүлгөн.
Трамп дүйшөмбү күнү Иран "азыр такыр башкача" экенин жана келечектеги дипломатияга да оптимисттик көз карашта экенин айтты.
"Мен бул бүттү деп үмүттөнөм. Ооба, менимче Иран сүйлөшкүсү келет. Менимче, алар тынчтык орнотууну каалайт жана мен муну колдойм", - деди ал.
Трамп АКШнын Иранга каршы санкцияларын “туура убакытта” алып салууну каалаганын айтып, “Мен бул санкцияларды убагы келгенде алып салууну жана аларга кайрадан калыбына келүү мүмкүнчүлүгүн берүүнү каалайм” деп кошумчалады.
