Жапониянын премьер-министри Санаэ Такаити Тайванга байланыштуу билдирүүлөрүнөн улам эки өлкөнүн ортосундагы чыңалуу уланып жаткан маалда Кытай менен диалог түзүү чакырыгын кайталады.
Дүйшөмбү күнү жаңы жылдын биринчи маалымат жыйынында өкмөттүн артыкчылыктарын сөз кылган Такаити, эки өлкөнүн ортосундагы тынчсызданууларды жана кыйынчылыктарды чечүү үчүн байланыштын маанилүү экенин айтты.
Киодо маалымат агенттигинин кабарына караганда Такаити: "Өлкөбүз Кытай менен диалог жүргүзүү үчүн ар кандай мүмкүнчүлүктөргө ачык жана эч качан эшикти жапкан эмес", - деп билдирди.
Такаитинин бул сөзү Кытайдын Жапониядагы элчилиги ишемби күнү Жапониянын айрым аймактарында коомдук коопсуздук шарттары начарлап кеткенин белгилеп, кытай жарандарына жакынкы аралыкта Жапонияга баруудан алыс болууну сунуштаган билдирүү жарыялагандан кийин айтылды.
Кытай элчилигинин акыркы билдирүүсүнө байланыштуу жапон расмий өкүлдөрүнөн азырынча эч кандай жооп келе элек.
Өткөн жылдын 7-ноябрында Такаити Кытайдын Тайванга кол салуусу юридикалык жактан «жашоого коркунуч туудурган абалды» пайда кылышы мүмкүн экенин жана мунун да Жапонияга биргелешкен өзүн-өзү коргоо укугун колдонууга шарт түзүшү ыктымал экенин айткандан бери Кытай менен Жапониянын ортосундагы чыңалуу күчөдү.
Анын билдирүүсү Пекинде кеңири нааразычылыкты жаратты: Кытай Жапонияга саякаттоодон баш тартууну сунуштап, деңиз азыктарын импорттоого байланыштуу тыюуну кайра киргизүү сыяктуу бир катар чектөөлөрдү ишке ашырды.
