Канаданын Торонто шаарына жакын жердеги бир китепканада мусулман аялга кол салган жана жоолугун өрттөөгө аракет кылган шектүүнүн кармалганын полиция билдирди.
"(Жабырлануучу) Китепканада сабак окуп жатканда, бейтааныш аял ага жакындап келип сөгүнүп, башына ар кандай нерселерди ыргыта баштаган», – деп билдирди Дурхам аймактык полициясы.
"Андан соң шектүү жабырлануучунун жоолугун чечүүгө аракет кылып, үстүнө белгисиз суюктукту куюп салган. Анан зажигалкасын алып чыгып, жоолукту өрттөөгө аракет кылган".
Жабырлануучу жардам сурап кыйкырганда, китепкананын коопсуздук кызматкерлери кийлигишкен. Полициянын маалыматына караганда шектүү качып кеткен, бирок бир нече сааттан кийин кармалган.
Канаданын Мусулмандар Улуттук Кеңеши (NCCM) бул окуяга байланыштуу «терең тынчсыздануусун» билдирди.
«Мындай зомбулуктун биздин коомчулукта кадимки көрүнүшкө айланып баратканы өтө өкүнүчтүү. Акыркы жылдары исламофобиялык окуялар кескин көбөйдү», – деди NCCMдин башкы директору Стивен Браун.
«Жетекчилерибиз бул маселени биргелешип чечүү үчүн аракет кылышы керек», – деп кошумчалады ал.
Ажакс шаарынын мэри Шон Коллиер жана китепкана кеңешинин төрайымы Пияли Коррея шаардык веб-сайтта биргелешкен билдирүү жасашты:
"Бул үрөй учурган кол салуунун курмандыктарына жана өзгөчө Рамазан айында — тынчтыктын жана руханий байланыштын айында болгон бул кол салуудан жабыр тарткан же көңүлү калгандардын баарына кайрылабыз: Биз сиздерди колдоо жана жек көрүүнүн бардык түрлөрүнө каршы туруу үчүн бул жердебиз".
Браун NCCMнин полициядан бул окуяны жек көрүү кылмышы катары карап чыгуу өтүнүчүн билдиргенин айтты.
