Түркия менен Омандын лидерлери Ирандагы согуштан улам күчөгөн аймактык чыңалууларды талкуулашты
Телефон аркылуу сүйлөшүүдө Режеп Таййип Эрдоган Иран менен болгон согуш «мурда болуп көрбөгөндөй коопсуздук кризиси» коркунучун туудурарын эскертип, дипломатияны улантуунун маанисин баса белгиледи.
Түркия Республикасынын Президенти Режеп Таййип Эрдоган менен Омандын Султаны Хайсам бин Тарык телефон аркылуу сүйлөшүп, эки тараптуу карым - катнаштар менен аймактык маселелерди талкуулашты.
Шаршемби күнү Түркия Республикасынын Президентинин коммуникация башкармалыгы берген билдирүүгө ылайык, Эрдоган сүйлөшүүдө: "Иранга жасалган чабуулдар жана андан кийин Ирандын аймактагы боордош өлкөлөргө кайтарган жообу аймакты мурда болуп көрбөгөндөй коопсуздук кризисине кептеди", — деди. Ошондой эле ал Оманга багытталган чабуулдардын "кабыл алынгыс" экендигин айтты.
Президент учурдагы оор кырдаалга карабастан, Түркия ортомчулук сыяктуу дипломатиялык демилгелерден баш тартпаганын жана бул багыттагы аракеттердин улантыларын баса белгиледи.
Президент ошондой эле Израилдин премьер-министри Биньямин Нетаньяху өкмөтүнүн оккупацияланган Чыгыш Кудстагы Аль-Акса мечитине мусулмандардын кирүүсүнө бөгөт коюусу "кабыл алынгыс" экенин жана Газа эли азыр да олуттуу гуманитардык жардамга муктаж экенин баса белгилеп, Тынчтык кеңешинин ишмердүүлүгү эки мамлекеттүү чечимге жетүү максатында улантылышы керектигин айтты.
Президент Эрдоган сүйлөшүүнүн акырында Хайсам бин Тарыкты келе жаткан Рамазан айты менен куттуктады.