Иран Израилдин бүгүнкү күнгө чейинки эң ири аскердик чабуулунан кийин Тегерандын өзөктүк программасы боюнча АКШ менен диалог “маанисиз” болуп калганын билдирди. Анда Вашингтон кол салууну колдоп жатат деп айыптады.
Ирандын Тышкы иштер министрлигинин басма сөз катчысы Исмаил Бекайи жума күнү жарым расмий Tasnim маалымат агенттигине: «Экинчи тарап (АКШ) өзүн диалог жүргүзүүнүн эч кандай мааниси жок калгандай алып барды. Сиз сүйлөшүүлөрдү жүргүзүп жатабыз деп айтып, андан соң сионисттик режимге (Израиль) Ирандын аймагын бутага алуу үчүн жол ача албайсыз»,-деди. Бекаи Израилдин кадамдарынын дипломатиялык процесске залакасын тийгизгенин жана кол салуунун Вашингтондун уруксатысыз болушу мүмкүн эмес экенин айтты.
Буга чейин Иран АКШны Израилдин чабуулдарына шериктеш деп айыптаган, бирок Вашингтон бул дооматты четке кагып, Тегеранга Бириккен Улуттар Уюмунун Коопсуздук Кеңешинде өзөктүк программа боюнча сүйлөшүүлөрдү улантуу «акылдуулук» болорун айткан.
Жекшемби күнү Омандын борбору Маскатта АКШ менен Ирандын өзөктүк сүйлөшүүлөрүнүн алтынчы айлампасы өтүшү керек болчу, бирок сүйлөшүүлөр Израилдин чабуулдарынан кийин качан болору азырынча белгисиз.
Иран уранды байытуу программасы жарандык максатты гана көздөгөнүн жактайт жана Израилдин өзөктүк курал жасап жатат деген айыптоолорун кескин четке кагып келет.
АКШнын президенти Дональд Трамп Reuters агенттигине берген маегинде, Израилдин чабуулдары болоорун өзү жана анын командасы билгенин, бирок келишимге жетишүү мүмкүнчүлүгү дагы эле бар деп эсептешкенин айтты.
